Tele pine a Samoa Pacific Games 2015

Talu lava ona amataina nei taaloga i le atu Pasefika i le tausaga 1963, o loo agaigai pea i luma le faatoateleina o atumotu o le Pasefika o loo auai i nei taaloga. O loo faamauina i le tausaga 1983 na uluai sao atu ai Samoa i totonu o lenei taaloga a o lausilafia ai o Taaloga a le Vasa Pasefika.

O le tausaga nei o loo tauva ai ‘Au mai i Niu Sila faapea ai foi ma Ausetalia mo le uluai taimi i nei taaloga. O loo foliga lelei le tulaga mai o Samoa i nei taaloga, o loo finau pea alo ma fanau a Samoa saili malo ina ia faaeaina Samoa i nei taaloga o loo faia nei.

E maitauina le maualuga o taumafaiga a Samoa i taaloga e pei o fusuaga poo faipelega, siisiiga uamea mamafa, faapea foi le fanafana, tuuga aau, taaloga taufetuli, alogavaa, tenisi, soka, lakapi taitoafitu, lakapi pa‘i, kilikiti, volipolo.

Mai le tele o nei taaloga ua mafai ona auai ai Samoa ona ua lelei ma ua fausia nofoaga i Samoa o loo atinaeina ai nisi o nei taaloga, i le nofoaga o taaloga lea ua iai nei i Tuanaimato, le Tuanaimato Sports Complex.

O loo molimauina le faaopoopoina pea o isi taaloga o loo tausinio ai nisi o alo ma fanau Samoa. O le isi vaega mataina o nei taaloga, o le tausinio ai ma avea ia taaloga ma auala e saofaga atu ai i le taamilosaga tele a le lalolagi o le FIFA i le taaloga o le Soka faatasi ai ma nisi taaloga.

O se vaaiga lenei i nisi o atumotu sa talimalo i nei taaloga i tausaga ua mavae.

Atumotu na talimalo i taaloga Pasefika Games

•1963 – Fiji Suva

•1966 – New Caledonia

•1969 – Papua New Guinea

•1971 – French Polynesia

•1975 – Guam

•1979 – Fiji Suva

•1983 – Western Samoa

•1987 – New Caledonia

•1991 – Papua New Guinea

•1995 – French Polynesia

•1999 – Guam

•2003 – Fiji Suva

•2007 – Samoa

•2011 – New Caledonia

•2015 – Papua New Guinea

•2019 – Tonga

O nei taaloga o lea ua savalia le vaiaso mulimuli o taaloga ma taualuagaina ai i le aso 18 o Iulai. O loo lipotia le lelei o le taligamalo a Papua i lenei taamilosaga i le tausaga nei, e lē o iai se vaega o faapopoleina ai le toatele i le taimi nei, o loo lelei ma atoatoa vaega uma o le taligamalo i le taimi nei.

E tusa ai ma faamaumauga ua mafai ona maua mai i Port Moresby i ‘Au a Samoa o loo faasolosolo lelei taumafaiga a Samoa i lenei taamilosaga, o loo iai le talitonuga e ono toe faaopoopoina nisi pine a Samoa a o iai i toe taimi mulimuli o le taamilosaga ma taualugaina ai nei taaloga.

A o tusia lenei ripoti, o le faatulagaina lenei o pine a Samoa ua ausia:                                   

GOLD 26                   

SILVER 17                

BRONZE 27

 O nisi ua maua e le tusitala ua faamanuiaina i pineauro i nei taaloga, o le fanafana ia Chen Pao i le pine Auro, Mary Opeloge i pine auro e tolu, e lē o maua tonu e le tusitala nisi o iuga aloaia o le tele o isi pine auro e pei ona faamauina i le taimi nei.