Na manino i ulugalu le upu folafola a le afioga ia Patele Epati Tamati e ala i le toe ta o le 2014 lea na vaaia le faatumulia o le palisi a Darra i le lolofi atu o le toatele o le ekalesia mai le tele o isi pitonuu o Brisbane se‘i faafofogaina.
Na logomalie lana saunoaga ina ua faafofoga le faalapotopotoga o ia ta‘ua le alofa matalasi o le Atua. “O ai ea ua afua ai ona ausia matati‘a, faataunuu faamoemoega ma uli ma sao fuafuaga a le tagata, aisea? Ioe ona o le Atua”. Ana lē seanoa Ieova poo penei ua fano i le ala le folauga. Na lē gata ina taliga e fia faalogo le lauga ae faapea foi le leo malie o aufaipese a le ekalesia poo le palisi Samoa a Darra sa lagiina viiga ma na pei e siva Salevao i le lue o le ao o le ta piano a o le paleni foi o siufofoga o le aufaipese.
Na mae‘a ona mapu ane lea i le hall e toe faamanatu nai motuga‘afa o le 2014, ma faia ai se vaivela a o talatalanoa e faafetaia le Atua ua tu laueleele i le 2015.
