Tele luitau o le tala autū o le Tupe

“$850,000 fuafua mo le Manu Samoa e tapena ai le Ipu o le Lalolagi”

O le Tala Autū o le Tupe muamua mo le tausaga faaletupe o lumanai nei, 2011/2012 a le paeaiga lona 15 a le Palemene ua manino mai ai le liliu o le Malo ua tulai mai i le mae‘a o le faiga palota tele ia Mati, e faaitiitia tupe faaalu a le Malo. Ua mafua lea fuafuaga o loo faailoa i le tala autū o le tupe, ona ua tulaga lelei mai auaunaga a le vaega tumaoti poo le private sector, ina ua tuanai galuega sa faia mo le faaleleia o se vaega o le atunuu na taia i le malosi o le sunami i le tausaga e 2009.

O tupe pa‘ū poo le deficit o loo fuafua e ausia i le tausaga faaletupe 2011/2012 e 6 tesimale 5 pasene (6.5%) o le tamaoaiga. O se laasaga lelei lea e faamalieina ai le naunautaiga o le Malo ia faasolosolo mālie le ausia o se tamaoaiga mausali.

I le saunoaga faaminisita o le tala autū o le tupe o loo faaalia ai e faapea, o le fuafuaga ia tuuitiitia tupe pa‘ū, o le faaitiitia faasolosolo lea o tupe faaalu a Matagaluega i le $12 miliona mai le tausaga nei, ae $26.5 miliona mai tupe faaalu i atiina‘e tetele. Ua fuafua foi le Malo e siitia ana tupe maua e ala i ni siitaga i lafoga ma tupe totogi lea o le a ono maua ai se vaega tupe e $11.61 miliona tala i le tausaga.

Siitaga o lafoga ma tupe totogi
O le amataga o le masina lenei o Iuni 2011 na amata faamamalu ai le siitaga fou i le tau o suauu e 5 sene i le lita. Ua silia i le sefulu tausaga e lei toe iloiloina se siitaga, ae o lea faato‘ā faatino. O le amataga o le masina fou o Iulai o le a amata faamamalu ai nisi o siitaga mai le 4 i le i le 5 pasene i le tau o tiute faaopoopo poo le excise tax i luga o oloa tau tapaa lea o le a siitia ai le tau o le sikaleti.

O le pepa sikaleti e 20 sikaleti i totonu o le a faaopoopo le 20 sene i lona tau o loo iai nei.
O le avamalosi poo le pia faapea faguinu suamalie o le a siitia i le 10 pasene o latou tau i le masina o Iulai.

O tau o tiute o faailogatusi mo fanua faatau o le a siitia foi i le pasene e tasi, ae faato‘ā faamamalu i le taimi e pasia ai le tulafono mo le faatinoina o lea siitaga fou. Ua faailoa foi i le tala autū o le tupe le siitia o tau ma totogi o auaunaga a le Pulega o Felauaiga i luga o le laueleele (LTA) i le tasi vae tolu (one third) e aofia ai le laiseneina ma le lesitala o taavale afi ma le faia o laisene.

O totogi o auaunaga a le Matagaluega o Tupe Maua e faasino i oloa faaulufale i le atunuu ma le laisene o avamalosi o le a siitia foi i le maualuga o loo fuapau ai le siitaga o galuega o loo faia e le Pulega o felauaiga i luga o le laueleele.

Atiina‘e ua faamuamua
O le aofaiga o tupe faaalu faaagaga mo le tausaga faaletupe 2011/2012 e $714.6 miliona. O a‘oa‘oga, le soifua maloloina, faatoaga, atiina‘e tetele i le eletise, suavai ma auala tetele ma ala laupapa ua ave i ai le faamuamua. Ua faapea foi i le atiina‘e o pisinisi, fesootaiga, taaloga, tagata tafafao, tulafono ma faamasinoga, aemaise le fesuiaiga o le tau ma le siosiomaga.

O le Matagaluega o A‘oga, Taaloga ma Aganuu ua fuafua ai se vaegatupe e $86.9 miliona ua aofia ai ma le $5 miliona o le fesoasoani a le Malo o loo faasafua i aoga a ekalesia ma aoga tumaoti i tausaga taitasi.

Ua faailoa foi le faaauau pea o le faiga paaga a le Malo ma malo o Niu Sila ma Ausetalia mo le fesoasoani i pili aoga o fanau i aoga tulagalua. O le Matagaluega o le Soifua Maloloina e $69 miliona.

• Matagaluega o Faatoaga ma Faigafaiva $12.4 miliona
• Atiina‘e tetele: Eletise $8.8 miliona, Suavai & Vai Lafoai $14.3 miliona, Auala Tetele ma Ala Laupapa $29.0 miliona
• Tagata Tafafao mai Fafo $11.39 miliona
• Tulafono ma Faamasinoga $8.5 miliona
• Feusiaiga o le Tau ma le Siosiomaga $23.2miliona
• Tupe Faaalu lē Fuafuaina $12.92 miliona

O vaega tupe ua fuafua mo le atiina‘e o taaloga ua faatatau ai e le Malo se vaega tupe e fesoasoani i le Iuni Lakapi aoao a le atunuu auā tapenaga a le Manu Samoa i le Ipu o le lalolagi. E $850,000 le vaega tupe mo lea faamoemoe.

Faaalia i le tala o le tupe le toe faasolo ina tulaga lelei o le tamaoaiga o le atunuu, peitai o loo iai pea luitau e ono taia ai lea tulaga lelei ona e mafua i le sunami malosi na aafia ai le atunuu o Iapani lea ua fai ma afaina i galuega a le kamupani o le Yasaki i Vaitele o loo gaosia uaea o taavale.

O le afioga i le Palemia na ia folasia le tala autū o le tupe i luma o le Palemene a o toesea le Minisita mo le lauina o le faaiuga a le faamasinoga i le tagi tau palota a Le Tagaloa Pita. Ua faaleaogāina uma moliaga a le itu tagi ma ua faatumauina pea le filifilia o Faumuina Tiatia Liuga i le tofi faipule o Palauli le Falefa.