Mai i le mamao o le aoga mo alii ma tamaitai e iai le manaoga e avea ma Auvaa poo seila, lea sa i Toloa i gatai atu o le Malaevaalele i Faleolo, o lea ua tatala nei se isi fale tele i le penisula i Mulinuu mo le aoga lava lea ua i lalo o le vaavaaiga a le Iunivesite Aoao o Samoa.
O le fale fou lenei ua lata i le lua tausaga o tau fausia ma e lē gata i le faleaoga tele ae ua fausia ai ma se uafu i Mulinuu lava auā le faatinoga o toleniga a tama ma teine o le aoga maligi.
E $33 miliona tala le tau aofai o le faleaoga tele ma o se tasi o atinae e tolu na faamae‘a uma i lenei masina. O le isi faleaoga tele o le Loto Taumafai ma lona nofoaga tutotonu i le afioaga o Vaitele.
O le faleaoga lona tolu o le faleaoga lea a le aoga tulagalua i le itumalo o Siumu.
O aoga tetele la e lua a le Maligi atoa ai le Loto Taumafai ia na tatala aloaia uma i le faaiuga o le vaiaso na tea nei. E fogafale lua le aoga tele lenei a le Maligi i Mulinuu ma ua umi ona faatautaia le galuega lenei ona o loo iai foi ma se vaega o le a faatuina ai se aoga nofotumau a le fanau.
Ua aofia ai foi i lenei galuega se nofoaga mo le tuu ai o vaa e faagasolo ai aoaoga ma toleniga a i latou ua aoaoina ai. O le aoga a le Maligi na amata faavae mai i le tausaga e 1979 ma o le nofoaga tuai i Toloa i Faleolo na faatu ai. O le amataga o lea aoga i Samoa e na o le to‘a 15 i latou na aoaoina ai ma ua tele le suiga i lenei vaitaimi lea ua silia ma le to‘a 100 alii ma tamaitai ua tauaveina lenei mataupu.
O le afioga i le Palemia Susuga Tuilaepa Lupesoliai Sailele Malielegaoi na saunoa i le auga o le faamoemoe ma na ia ta‘ua le tele o le sao o le Malo o Saina i le malo o Samoa e ala i nei galuega.
Ua fausia foi e le au kamuta le kamupani mai Saina Hunan Construction se uafu e fesoasoani ai mo aoaoga a i latou ua i totonu o lenei aoga tele. O le galuega na amata mai i le tausaga e 2013 lea ua mae‘a i lenei tausaga.
O le aoga seila ua vaaia le toatele o fanau ua agai i ai ma o le tasi foi lenei galuega ua toatele fanau a le atunuu ua maua ai galuega i lenei vaitau i vaa la‘u pasese o le Metitirane, e lē gata i lea o vaa ua galulue i Italia, Falani ma Asia ma o le taumafaiga ina ia avea lenei avanoa e maua ai galuega a alii ma tamaitai i atunuu mamao.
