O fanau, o ni avefeau malolosi ma le faaaogāina,
a o ni mea pueata i totonu o aiga ma le siosiomaga
“Ia faamuamua a’u ae lē o taaloga faitupe.” O se lauga aogā ma se feau sa matuā osofaia, ma ua aiāina ai lagona ma finagalo o le toatele o mātua ma aiga. Sa faaleo e le fanau le tele o lagona tāua na tauala i tusiga solo sa faia ma faasalalauina i luga o le Radio Samoa.
O le ala lea o le tosina ma le faigofie ona talia e mātua le feau sa momoli, ma afifi i totonu o solo a le fanau.
O le tulaga lelei lea ma le manuia, ae o se taunuuga lelei foi ma le aogā, sa faaiu i ai le tauvaga solo a le fanau, i le polokalame a le Mapu Maia.
Sa faamaonia mai e le pulega o le faalapotopotoga a le Mapu Maia, le toatele o mātua ma aiga, sa valaau ane ma ta’utino le mae’a faia ai o ni filifiliga tatau ma le mautu, talu ai le galuega taulogologo sa faaaogāina ai alo ma fanau mo le faatinoina.
Na ta’ua e le tamaitai Faatonusili o le Mapu Maia, le faletua ia Pesio Ah-Honi, sa lagona le faagaeetia ma le agaga faafetai i mātua sa fesootai ane i le ofisa ina ua mae’a le aso faapitoa sa tufatufa ai faailoga mo le fanau.
Ona o tautinoga ma molimau sili ona tāua, e tusa ai ma a latou filifiliga ua faia, o le a taofia ai le fiafia ma le faamuamua o taaloga faitupe, ae manatu māmā i alo o ma fanau.
Fai mai Pesio, e lē gata ina sa faafetai tele mo ia mātua ua faia ni filifiliga poto ma le tatau, ae sa faailoa ane foi le lagona lava e tasi o le fiafia ma le faafetai o mātua, i le pulega a le Mapu Maia, ma le Radio Samoa, ona o le lagalaga, ma le galuega logologo, ua mafai ona maua ai lea avanoa taua, e toe suia ai fuafuaga i totonu o aiga, ma soifuaga taitoatasi.
Sa faalautele le agaga faafetai o le pulega i le viiga o le Atua, ona o le faataunuuina o le polokalame ma ua faaiuina foi ma le manuia, ae sili ai le tele o lona taua e pei ona molimauina e matua ma aiga.
O le galulue faatasi, ma le tutu faatasi o le ki lea ma le mafuaaga o le manuia o soo se tausinioga ma soo se faamoemoega, e pei ona saunoa i ai le faletua ia Pesio Ah-Honi.
O nisi o solo a le fanau, sa maitauina ma faamaonia le loloto ma le tamaoaiga, o feau ma le agaga sa tusia ai, ma o se tulaga ua matua faafiafiaina ai le pulega a le Mapu Maia, ae faapea foi le faalapotopotoga a le Gamblefree i Niu Sila.
E 146 solo na faaulufaleina i le tauvaga a le fanau sa faia, ma o se tulaga ua toe tutu’i ai foi se isi faamaumauga lelei a le Mapu Maia, i le va ma le faamalu tele o le faalapotopotoga o Taaloga Faitupe a Niu Sila.
