O le talafatai o le taulaga o Apia e aupito toatele fanau laiti o loo aoaoina ai i aoga tulagalua ua avanoa i nuu taitasi ma aoga i le taulaga lava ia. O le fuafuaga a le Malo e ala i le matagaluega, ina ia mafai ona agai fanau i aoga a o latou lava itumalo e aoaoina ai mo Kolisi ma aoga maualuluga, ua vaaia le faigofie i aoga i afioaga i tua, ae o le taulaga ua vaaia lava le faigata.
O loo iai le tele o kolisi ae o le tausaga lenei ua ulufale ai lava na o fanau na sue i le suega ulufale a le Kolisi o Samoa ma le suega ulufale a le Kolisi o Avele. O le Kolisi foi o Leifiifi ua na o fanau lava na aooga i le Apia Primary o loo maua ai avanoa. O le fanau la e lei au i aoga nei e lua ma e lei aooga i le Apia Primary, a lē maua se avanoa i le kolisi o le Vaimauga e agai e saili aoga a le lotu e faatonu ai le fanau.
O le kolisi foi o Maluafou na o fanau foi na au atu e ala i le latou suega ulufale o le tausaga na tea nei. Faaalia e le alii Ofisa Sili o le Matagaluega o Aoga, Afioga Matafeo Falanaipupu Tanielu Aiafi, o le taumafaiga lenei o loo agai ai lava ina ia mautu le faatulagaga o aoga e agai i ai le fanau o loo i aoga tulagalua a nuu o le taulaga, ma o le faigata lava ona o le toatele o fanau i lenei itu o le atunuu.
O loo agai foi le matagaluega e sailiili lelei pe o le a avea loa kolisi nei e lua ma aoga e faaamalosia ai sone pe o lea na o i latou lava e sue i suega ulufale o le a maua ai avanoa. E ui o lea ua amata nei aoga i auala nei ua faataatitia e le Matagaluega, ma o le a vaavaai foi pe o le ā le tulaga o le a agai i ai aoaoga a le fanau i suiga nei ua faia i ai.
O le faamatalaga a le Ofisa Sili, o loo vaavaai foi pe gafatia e le Kolisi o Vaimauga le toatele lea ua agai atu ai i le lē maua ai o avanoa i kolisi e tolu e pei ona ta‘ua. O le unai lava a le Matagaluega i le faamalosia o le agai o fanau aoga i Kolisi a o latou itumalo ona o le manaoga ina ia faaauau pea aoaoga a fanau i lea itumalo ma lea itumalo e taofia ai le tau agai mai ma nofo aoga i aiga, talu ai lava le tele foi o aafiaga o fanau i nisi o aiga o loo nonofo ai ma le leai ai o se mafutaga ma mātua pe a o ese fanau mo aoaoga i le talafatai o Apia.
E faigata lava foi le suiga ona o le toatele lava o mātua e lē o talitonuina lava aoga i itumalo e tusa pe o lea ua faamaonia le avea ma kolisi, ma e agai mai lava e tauanau avanoa o fanau e aoaoina ai i Kolisi o loo i le talafatai o Apia.
O lea la ua amata pea lenei suiga ma le faamoemoe o le Matagaluega o Aoga, e lata mai se taimi o le a tutusa uma ai lava aoga maualuluga i le vaai a mātua ma saga unai ai loa le nonofo o fanau e aooga i Kolisi i totonu o o latou lava itumalo.
