Ole aliali mai i fafo ini molimau ose taupulepulega ise solaaga tele a pagota mai le falepuipui i Tafaigata na avea ma tapenaga ale lata ile selau leoleo na auai ile osofaiga poo se raid ile aoauli ole Aso Faraile ua mavae a’o amata salalau ai lipoti ose afā oloo agai mai i Samoa.
Ole Komesina o Leoleo le afioga Fuiavailili Egon Keil ma nisi o leoleo sinia na tapenaina le osofaiga lea na su’e faatapito ai sela oloo nonofo ai le au nofosala. Na agai le osofaiga ile fia maua oni aupega poo nisi mea faitino e ono faamausali ai mau ose tapenaga a pagota e faia se gaioiga e mafai ai ona sosola ese ma le falepuipui.
Na faaalia e ni molimau e iai pagota sa taulamua ile taupulepulega lea sa aafia ai ma nisi pagota, ae peitai na mautala iai leoleo ole falepuipui ma logo ai le pulega, fesootai loa le Komesina o Falepuipui ile Komesina o Leoleo ma amata ai loa ona faataoto le ata ose gaioiga ole a faatino a’o lei faia e pagota se isi laasaga e taunuu ai le solaaga.
O faamatalaga uma ile taupulepulega lenei e lē o mafai ona masaa mai i fafo ona o itu ia oloo agai iai suesuega a leoleo. E toatolu pagota na taofia ile mae’a ole osofaiga mo le fesiligia e leoleo. Oloo laumanu’ia ise isi lipoti le suafa ole alii pagota o Filipaina lea na tatala i tua ise finagalo ole pulega ole falepuipui ile taimi ole Kirisimasi ua mavae ona ole fia auai ile faia o sana nofo ise suafa matai o lo latou nuu o Faleatiu.
Ta’ua e se molimau na avane Filipaina ua tuu ile vaaiga a leoleo ile pou i Faleata ose gaioiga na faia muamua a’o lei faatino le osofaiga ile falepuipui. Oloo iai tala salatua e faapea o lea alii pagota sa i totonu ole taupulepulega. “Ole gaioiga a leoleo lea na faia ua tuu atu ai lava ia i latou sa aafia ile galuega e fai e latou le faaiuga talafeagai,” ole finagalo lea ole afioga ile Palemia ole Minisita ole Matagaluega o Leoleo, Falepuipui ma Tineimu ina ua fesiligia.
E lei tele nisi tulaga na saunoa iai le Palemia ile mataupu ae oloo iai se molimau ua ta’ua na fuafua tonu le solaaga ile taimi ua vevesi le atunuu i lapataiga ole afā o Gita, ma ole faamatalaga e faapea ole autu foi lea na tata’i iai le tapenaga a pagota.
Ua maua nisi molimau e faapea o nisi lava ole au nofosala na latou faailoa ini leoleo ole falepuipui le taupulepulega, ole pogai lea na vave maua ai e i latou o pulea le falepuipui ma faapena loa ona logo ai le Matagaluega o leoleo mo se galuega.
