Teena talosaga apili alii pule o le Wilex

Ua faatonuina e le Faamasinoga o Talosaga Toe Iloilo poo le Faamasinoga Apili a le atunuu lea e tauaveina e ni alii faamasino mai Niu Sila, le aofia o le pule faatonu o le kamupani o le Wilex, le susuga Eddie Wilson i le totogiina atoa o le taui e tasi tesimale 2 miliona i le faalapotopotoga o le malosi tau eletise le EPC, ina ua lē manuia lana tagi poo se su na faia faasaga i le EPC, sa tuua’ia i le faatamala na mafua ai ona aafia le fale o le kamupani i Moataa i le malaia.
O le mataupu lenei na suesueina e le Faamasinoga Maualuga ma teena ai le su e sefulu miliona a le Wilex faasaga i le EPC. Peitai na toe apili e le faalapotopotoga o le malosi faaeletise le faaiuga a le Faamasinoga na poloaina ai e na o le 48 pasene o le taui e tasi tesimale lua miliona e totogi e le alii pule faatonu ae o le isi vaega tupe atoa e totogi e le au faisea o le kamupani.
Ua faaalia i le faaiuga tusitusia a le Faamasinoga o Talosaga Toe Iloilo, e sese le faaiuga a le alii faamasino na ia tagofia muamua le mataupu ma faia i ai le faaiuga i le totogiina lea e le pule faatonu na o le 48 pasene ona a fua i le faatupega atoa o le kamupani, o le alii pule faatonu ma lona aiga e umia se vaega tele o sea.
I le mataupu lava lenei na apili ai foi e le alii pule faatonu le faaiuga a le Faamasinoga Maualuga e faasino i le mafuaaga o le afi lea na teena ai le mau a le kamupani e faapea o se fuse na sioki poo se short circuit mai se transformer i luga o se pou moli e lata tonu i le fale na aafia i le afi na mafua ai le mu.
Na talosaga le kamupani i le Faamasinoga Apili ina ia toe valaau le faamasinoga ona e iai ni molimau fou ua latou maua e mafai ona luitauina ai molimau a se alii poto faapitoa i faalavelave tau mu sa lagolagoina le mau tetee a le EPC.
Peitai ua faaalia i le faaiuga a le Faamasinoga Apili, e ao i se itu na te toe luiina se faaiuga a le faamasinoga i le toe tuuina atu o ni molimau fou ona faamalieina taiala a le faamasinoga i ana galuega faatino e mafai ai ona toe suesueina se mataupu.
O le silasila a le Faamasinoga o Talosaga Toe Iloilo, e lei mafai e le Wilex ona faamalieina suesuega a le Faamasinoga Maualuga i le tuuina atu o ni molimau e lagolago ai le latou mau sa finauina ai e faapea, o le faaletonu o le tiute ma le auaunaga a le EPC na mafua ai le mu.
O le faaiuga foi lea ua taunuu i ai le Faamasinoga o Talosaga Toe Iloilo, o le teena o le apili a le Wilex i le tuuina atu o ni molimau fou e toe valaau ai se suesuega a le Faamasinoga Maualuga i le latou tagi.