O le masina ua mavae na aumai ai le faaiuga a le Faamasinoga o Fanua ma Suafa i le finauga i le va o itu na talosaga ma itu na tetee i le sailiga o le pule o le fanua o Setuatia i Tanugamanono.
O le iuga o lea finauga ua faatumau ai le pule o le eleele i le suafa Faumuina o Tanugamanono, ae pule faamalumalu le suafa Atoamafuaiupolu o le Itu paepae o Atoa Foemua.
E ui ina taoto lea faaiuga ae ua faaalia e le faletua o Afu Faumuina Tutuila o loo nofoia ma faaaogāina le fanua o lo latou aiga, e toatele nisi e tau i le mataupu ua latou faasalalau i upega o fesootaiga televavave faaonapo nei le facebook, ni faamatalaga lē sa‘o.
O ni faamatalaga na faaalia e Afu ua saveu ai le filemu ma ua mautinoa ua ‘aitui ai ia tagata i le finagalo o le faamasinoga.
O le naunau o le faletua e faamalamalama mo le silafia ei latou o loo nofo pogisa ma taitaiseseina manatu i le faaiuga ona o tala feaveai solo e le matagi ua ia tauaao mai ai le faaiuga tusitusia a le faamasinoga mo le faalauiloaina i lona manatu o le auala sili lea e maua ai le malamalama atoatoa.
O loo faateaina ma Tanugamanono le aiga o Faumuina Tutuila ae e pei ona silafia o se mataupu lenei ua mae‘a ona faia i ai ni faamasinoga ma aumai ni faaiuga.
E silia foi i le valuselau afe se taui tupe ua faatonuina e le Faamasinoga Maualuga alii ma faipule o Tanugamanono e totogi i le aiga ona o a latou meatotino na faaleagaina.
