Ua lē mafai ona tuua Samoa e le alii mai Eleni ae ua faamautu nei i Peretania o Nicolas Gianno, ma le tamaitai Samoa o Rosita Stanfield ua nofomau foi i Peretania.
Ua mae‘a ona aumai le faasalaga a faafalepuipui mo i laua nei na faamaonia moliaga o le faia o gaioiga taufaasese ma taufaavalea i tupe a tagata sa la aumai e ave e faafaigaluega. E lei tulia o la faasalaga e pei o le tolu tausaga mo Nicolas Gianno ma le 5 masina mo Rosita Stanfield ona o loo iai le la talosaga e apili le faaiuga lea e faatoa suesueina e le faamasinoga o apili i le masina o Aukuso.
O le mafuaaga lea na talosaga ai le la loia mo se avanoa e mafai ai ona la tuua le atunuu mo Peretania e fia asiasi io la aiga ona ua atoa le tausaga o aumau i Samoa ona o le faataliga o le faaiuga a le faamasinoga i o la moliaga.
Peitai o le faaiuga a le faamasino sili na fofogaina i le aso ananafi na ia ioe ai i atugaluga o le itu a leoleo i le maualuga o le tulaga o le lē toe foi mai i Samoa o i laua nei pe a ave i ai se avanoa.
E leai foi se feagaiga a Samoa ma Peretania e mafai ai ona aumai faapagota i laua nei pe afai e lē tausisia se aiaiga e malaga ese ai ma toe taunuu mai i le taimi e suesue ai le la apili.
O le lē manuia o le la talosaga na faaalia ai le toatamai o le alii o Nicolas i tusitala ma ia taumafai ai e fao le meapueata a se alii tusitala sinia. Na ia lafo ai foi ni faamatalaga na ia faitioina ai le faamasinoga ma tuua‘ia le faamasino sili i le lē faia o le faaiuga amiotonu mo i laua.
Faaalia e Nicolas e leai ma se tupe a se tagata na la ave faasolitulafono ma o le itu lea e lē o amiotonu ai le faamasinoga ma le faaiuga ua faia. Na toe maua le to‘a o le alii ma le tamaitai o Rosita ona la toe faamaualalo lea i upu ua mao luma faasaga i le Faamasino Sili.
