Ua teena e le faamasinoga maualuga se talosaga e faasee ese ni loia se toalua mai le tauaveina o ni itu e iai sootaga i se mataupu tau eleele o le esetete poo meatotino o loo lesitala o fanua o Teariki poo Tealiki o le atu Kuki, Niu Sa Uelese i Ausetalia ma Samoa.
O le talosaga lenei na finauina e faapea o ia loia e iai o la sootaga faaleaiga i a’i latou o loo aafia i le mataupu ma e tatau ai ona saili nisi loia e mafai ona tutoatasi ile finauina o le mau a ia itu o le faamasinoga.
E pei ona silafia o nisi o eleele umia saoloto poo freehold land o loo ile lotoifale o le taulaga o Apia mai Matautu e oo atu i Sogi faapea Saleufi ma nisi o pitonuu o le taulaga o loo aafia i le finauga lenei, e pei ona faailoa ai e nisi o suli o Teariki o nisi o o latou tupuaga o ni tagata Samoa ua aveesea faamalosi ini auala faaalatua ma ua umia e nisi tagata ma pisinisi.
O le ofisa o tausi mavaega ma le ofisa o le lesitala o fanua o loo faasaga iai le talosaga a suli o le aiga, faapea le ofisa o fuafanua tutoamaoti sa iai i tausaga ua mavae sa faagaioia le fuaina o ia eleele ose pisinisi a le afioga Patu Afaese Hunter, o se tasi o itu o loo aafia i le suesuega o le mataupu.
O le masina fou ua faamoemoe e valaauina ai le mataupu lenei mo le suesueina, ma ua faatumau pea loia ua mae‘a ona tuuina atu i le faamasinoga o le a finauina itu e lua o loo teena le talosaga mo le toe tuuina atu o ia eleele ua aveesea.
