Teena e Samoa lipoti oloo mananao ia Gordon Tietjens

Gordon Tietjens
Gordon Tietjens

E sese ripoti oloo tuliloaina ele SRU Gordon Tietjens e avea ma faiaoga ale Samoa Sevens. E lē sa‘o ia ripoti, ole faaliga mai lea ale CEO ole Iuni Lakapi a Samoa, Faleomavaega Vincent Fepuleai.

“Na ou vaai i ripoti ile nusipepa o lea e tuliloa e Samoa le faiaoga tuai ale All Blacks Sevens. E lē sa‘o ia ripoti.” Na ta‘ua foi e Faleomavaega, e lē tuua ai le apalai o Tietjens ile avanoa ua faasalalauina pe a faapea ose mea lea e manao iai o ia.

Ae o ripoti sese lea na faasalalau ele leitio Niu Sila, tusia ai i totonu o isi nusipepa e faapea oloo mananao le Iuni Lakapi a Samoa ia Gordon Tietjens.

Na ta‘ua e Faleomavaega, oloo faagasolo pea le sailia ose faiaoga fou mole Samoa Sevens. E lē o mafai ona faailoa mai ele SRU le aofai, poo igoa o i latou ua tusi talosaga atu mo le avanoa. “E puipui le Iuni i tagata ia, aemaise o latou naunautaiga taitoatasi ile avanoa. E lē o mafai ai ona faailoa atu ia tulaga,” ole saunoaga lea a Faleomavaega.

“E tasi le mea e mafai ona faailoa atu, o lea ua faagasolo le faatulagaina o talosaga ua taunuu mai, aemaise ai le galuega a faiaoga ma faufautua faapitoa ale Iuni e uiga ile siakiina o talosaga nei.”

Oloo sailia se faiaoga e sui ia Damian McGrath o Egelani lea na faagata lana konekarate ele Iuni Lapaki ina ua lē mafai ona sao atu le ‘au taitoafitu ale atunuu ile Olimipeka i Rio.

A‘o sailiiliga ale Samoa Times, ua faamaonia ai le toe apalai o Muliagatele Brian Lima ile avanoa faiaoga ale Fitu ale atunuu. O Muliagatele sa avea ma faiaoga lagolago ale ‘au i lalo ole vaaiga a Damian McGrath.