Teena e Palusalue ni tuuaiga o taufaamatau i le Palota

O le mae‘a o le faiga filifiliga i palota laititi a le Atu Safata ma Faleata i Sisifo na laga ai e se tasi o sui tauva mai i le itumalo o Safata le manaoga ina ia faamautu lelei nisi o vaega o faigapalota o loo manatu e le o lelei ona vaavaai ma faamautu.

Ua faaalia e le Afioga Vaasatia Poloma Komiti lea na tauva mai i le Atu Safata, sa iai lipoti ua oo atu ia te ia o le taufaamatau i tagata palota aemaise o nisi o auala faaalatua e pei o le faia o taumafataga e lei oo i le taimi e tatala ai nei faiga i le aso o le palota. Na faapea foi ona iai molimau na ta‘ua e le alii tauva sa faalauiloa ai lava ata poo posters o tagata tauva i le palota ae ua leva ona oo i le taimi sa tatau ona talai ai i lalo ia ata faalauiloa a o loma ai le faiga filifiliga.

Faaalia e le afioga Vaasatia, o nei faiga e mautinoa le aafia ai o faiga filifiliga a le au palota ma o se tulaga e tatau lava ona vaavaai i ai le ofisa o faigapalota a o loma ai le palota tele a le atunuu.

Na tāpā se finagalo o le sui tauva lea na tulagalua i le faiga filifiliga a le itumalo o Safata pe o le a faamautu lana faitioga i se tagi e ave i le Faamasinoga.
O lana tali e leai se manatu e avatu lenei mataupu i le Faamasinoga ona o le umi e faatino ai e oo mai lava le isi faiga filifiliga tele a le atunuu o loo tau faagasolo lava i le faamasinoga ma e sili ai le laga ina ia faalauiloa ia tulaga ina ia matau lenei faiga i le agai i luma.
Ua iai foi le finagalo o le afioga Vaasatia o le a sauni atu e tausinio i le isi faiga filifiliga.

Faaalia e le Tofa Palusalue Faapo II e leai lava ni lipoti o ni tau faamatau o aliae mai i le faiga filifiliga a lona itumalo, ma e tatau i le afioga Vaasatia ona faamautu lea faitioga e ala i le saili o ana mau maumaututu e faamaonia ai ia tuuaiga.

Faaalia e le Tofa Palusalue na manino ma faamaoni le faatinoga o le faiga filifiliga a lona itumalo e pei ona toe tulai mai ai o le isi lea sui o le Itumalo o Safata e tauavea lenei vaega faaiu o le paeaiga o iai nei a le Palemene. O le isi sui tauva a le Itumalo o Safata o le Afioga Tuia Paepae Letoa lea o loo ua i le vaega faaupufai a le HRPP o loo tulai mai i le foe o le Malo.

O le Tautua Samoa lea o loo tulai mai ai nei le tofa Palusalue Faapo II.