Ua saga faatumauina pea le faaiuga a le Faamasinoga o Fanua ma Suafa i Mulinuu na faia i le aso 14 o Fepuari 2003, i le talosaga a Alii ma Faipule o Leulumoega mo se poloaiga e taofia ai le faaaogaina e le afioaga o Samatau o nisi o vaega taua o o latou faalupega. E iva vaega sa finauina i lea tagi e aofia ai le igoa Leulumoega, o le upu To‘aiva, o Tei o Sooa‘emalelagi, Matuanatogi ma le Avaganofoa, Sa‘oaumaga o le Toleafoa, o le igoa Umaga ma le Pasese, o tiute o Alipia ma le To‘aiva i le va ma Tumua ma Pule e ono, ma le Malae i Ma‘auga. O le faaiuga foi lea na faataua ai tofiga ma mavaega a le Tupu o Fonoti ia Toleafoa, ona e lei lagafuaina le mavaega a le Tupu.
“Ua lata toe taimi o le Tupu, ae o lana avega mamafa e tauave, o le alofa lea i lana fanau poo fea a feeunai solo ai pe a mavae atu o ia. O se ata faapea ua lafoia nei i luga o Leulumoega ma Samatau, e pei ona faaalia i le faaiuga, peitai ua leai se tasi na te faia se feagaiga i le va o nei nuu e lua. Ua le maua se taulasea i Ma‘auga ma Nuuausala, ua siliga foi se laveai mai Niuapai, Lea la ua saili togafiti i le faamasinoga. E ui ina lilia le faamasinoga ona o la tatou aganauu, ae ua le alofia tiute e pei ona tauto ai i le tausia o le tulafono e tutusa ai tagata uma o Samoa”, o se vaega lea o le finagalo o le faamasinoga i lana faaiuga o le aso 14 o Fepuari 2003.
O Leulumoega ma Samatau e iai vaega o o la faalupega e tutusa ai e pei o Leulumoega:
Tulouna oe Leulumoega, Tulouna oe le Faleiva, Tulouna lo outou Matuanatogi o Alipia, Tulouna lou Tapa‘au o le Tuia‘ana ma ona Tafai o Umaga ma Pasese, Afio mai Sooa‘emalelagi, Afio Tuioti ma Taualafai o alo o Tamaalelagi, Alala mai oe le Tumua.
O faalupega o Samatau:
Tulouna oe Leulumoega, Tulouna oe le Talaolefale, Tulouna lo outou Falefa o Usoalii, Afio mai le Gafa – o Taetele, Afio mai Fiame, Afifio mai Ma‘upu o Tuia‘ana, Afio mai Alo o Tamaalelagi.
Sa toe finauina e Alii ma Faipule o Samatau le faaiuga a le faamasinoga i le tausaga e 2003 i ona vaega sa faavae ai le faaiuga. Peitai o le aso 10 o Iulai 2009 na aumai ai le faaiuga a le Faamasinoga o Talosaga toe Iloilo, le Court of Appeal i le Faamasinoga o Fanua ma Suafa ma ua teena le talosaga. Ua mafua ona ua le mafai e le itu talosaga ona faamaonia se tasi o tulaga e ao ona faamaonia faaletulafono i lalo o le vaega 79 o le Tulafono o Fanua ma Suafa 1981 e mafai ai ona toe iloiloina le faaiuga a le faamasinoga e pei o le faaiuga lea i le talosaga a Alii ma Faipule o Leulumoega ina ia taofia le afioaga o Samatau mai lo latou faaaogaina o faalupega o Leulumoega. I le iloiloga a le faamasinoga apili ua taunuu ai i le faaiuga e leai se mataupu fou ua laga i le talosaga apili e ao ai ona toe iloilo le faaiuga. O mafuaaga foi na tauaaoina e le itu talosaga o mataupu lava ia sa tuuina atu mo le iloiloina e le faamasinoga maualalo ae sa teena e le faamasinoga maualalo (Lands and Titles Court).
O le faaiuga ua faatumauina:
Ua faamaonia e le faamasinoga e iai le Leulumoega i faalupega o Samatau. Ua faamaonia foi o le To‘aiva ma Tei o Sooa‘emalelagi ua na o Leulumoega i Alofi e iai ia faalupega. O faalupega o le Matuanatogi ma le Avaganofoa, o a Alipia ia. Ua talia foi e le faamasinoga le faaaogaina e Samatau o le igoa Tole‘afoa o le Sa‘oaumaga, aemaise ua faamaonia o le Umaga o le savali a Alipia ma le To‘aiva, ma o le suafa matai foi o Leulumoega i Alofi. Ua talia e le faamasinoga le faaaogaina e Samatau o le igoa Pasese i lona faaaogaina masani i taimi o agatonu, a ia le o se suafa matai faatino. Faaalia e se tasi o matai o Leulumoega le tofa Tolofuaivalelei Falemoe Lei‘ataua, ua manino mai i le teena o le talosaga apili a Samatau o le faaiuga lea na faia i le aso 14 o Fepuari 2003, o le faasinomaga tonu lea e maua ai le nonofo filemu o itu e lua i le va faafeagai ai ma Samoa ma ona upu taoto mai anamua.
