Tauvaga tala & faafiafiaga faa-Samoa Autalavou EFKS Papatoetoe

Soo se faamoemoe e tapuaia e faataunuuina lelei ma faaiuina i le manuia. O le afiafi o le Aso Toonai na faatumulia le maota o le Maleola i Magele i le taupati atu o aiga, o uo ma aumea mamae a alo ma fanau o le autalavou aemaise o tauaiga o tagata lolotu a le Ekalesia EFKS i Papatoetoe, e maimoaina ma molimauina le faataunuuina o polokalame ma fuafuaga faataatia a le autalavou e pei ona sa faatinoina ai i lea po.

O le polokalame faaauau lea a le autalavou sa faia ai se tauvaga o le faatinoga o ni tala faasamoa, o siva mauluulu, o le vaaiga i le faatinoga a le taimipese, o le agavaa lelei o le faatinoga o le saasaa a le taupou, o le matagofie ma le onomea o tagata uma i le togiga, o le faatinoga o le taualuga aemaise o le agavaa ma le tomai i le faatinoga o se tofiga (best actor/best actress).

E fā vaega na vaevaeina i ai sui uma o le autalavou mo le faataunuuina o lea faamoemoe ma o igoa nei o nei vaega, o Taemanutava‘e, Leutogitupa‘itea, Tapuitea ma Feepo.

O se polokalame matagofie ma le saunia lelei o vaega uma o le autalavou auā na matuā faamalieina le silasila ma le maimoa a le paepaega o tagata lautele i lea po. Na mae‘a le tauvaga o le faatinoga o tala faasamoa ona faagasolo lea o le tauvaga o siva mauluulu, o togiga, o taimi pese, o taualuga ma saasaaga a le taupou.

O le faatinoga foi o tala faasamoa na aumai faatasi ai lava ma ni aoaoga tāua ma le talafeagai lelei mo le faaauupegaina o tupulaga talavou o le Ekalesia auā tauiviga ma le finauina o faafitauli ma faaosoosoga e fetaia‘i ma ono afaina ai fua le ola taumafai ma le ola saili o fanau, aemaise o le faafetauiga lelei o le uiga o le ola ma le soifua malamalama o tupulaga i le vafeagai ai ma mātua, faapena foi ona iloa ma mautinoa le tausiga o le feagaiga a le tama tane o le meauliuli i le mata o le tama tane o lona tuafafine.

Sa valaaulia faapitoa le Susuga i le Faifeau Toeaina o le Pulega a Aukilani, le Susuga Fiatepa Faaee ma lona faletua o Penina Faaee, o le Tofa Pa‘u Telei‘ai Puni ma le Tofa Sooalo Setu Mua o latou ia sa feagai ma le faamasinoina o le tauvaga i lena po.

O le faaiuga o lea faamoemoe na fofogaina ai e le tofa Sooalo Setu Mua ma o le faatulagaina na saunoa ai Sooalo, e lei faigofie ona faia o faaiuga ma filifiliga a faamasino ona e matagofie ma lava tapena uma vaega e fā, peitai e tatau lava ona faataunuuina le fuafuaga e tusa ma le polokalame ma e lē mua uma foi ni vaa.

O le vaega la na manumalo i le tauvaga o tala faasamoa o le vaega a Leutogitupa‘itea, lona lua o Taemanutava‘e, lona tolu o Tupaitea ma le lona fā o Feepo. O le faatinoga o le siva mauluulu na tulaga muamua ai Feepo. Lona lua o Taemanutava‘e, lona tolu o Leutogitupa‘itea ma le lona fā o Tapuitea.

O le faatinoga o le taualuga na tulaga muamua ai Taemanutava‘e, lona lua o Feepo, lona tolu o Tupaitea ma le lona fā o Leutogitupa‘itea. O le matagofie o le togiga na tulaga muamua ai Taemanutava‘e, lona lua Leutogitupaitea, lona tolu Tapuitea ae lona fā ai Feepo.

O le taupou na sili ona matagofie ma lelei, onomea ma mataalia lona faatinoga o siva faatausala samoa o le taupou a Taemanutava‘e, o le fuataimi mataalia ma mālie ana taga i le maimoa o le fuataimi a Feepo.

O le tagata na matuā atoatoa lelei ona ia faatino le tofiga na ia faia mo alii (best actor) na mauaina e le vaega a Taemanutava‘e le tamalii lea na fai ma tamā o Leauta le Susuga ia Auapaau Pupualii ae o le itupa o tamaitai (best actress) na manumalo ai le vaega a Leutogitupa‘itea le tamaitai o Eseta Vavae.

Na taualuga le faamoemoe o le autalavou i le saunoaga matagofie a le susuga i le toeaina le tamā o le pulega a Aukilani na ia toe faamalosia ai le faamanatu atiliina pea le taulogologo i tupulaga talavou ina ia faaauau ai pea le faatāuaina o le malamalama i le aganuu i tu ma aga a le tama ma le teine Samoa.

Best Actor - a le Veaga a Taemanu Tava'e

Feepo (Mafoa Faatea) ma lona atalii o Leatiogie (Uelese Vavae)

Le aotelega uma o autalavou sa fai o latou sao

Le laulau a faamasino -

Le taupou a le Vaega a Leutogi Tupaitea

Le taupou a le Vaega a Taemanu Tava'e

Le Vaega a Tupaitea

Best Actress - a le Vaega a Leutogi Tupaitea

I latou uma na faatinoina le tala a Tupaitea