Ua mae‘a fuafuaina le tauvaga siva faaleagaga o le hip hop sa faataunuuina i le po o le Aso Faraile, aso 7 o Tesema nei lea sa faatautaia e le Ekalesia Harvest Worship Centre a Logan City o loo tausia e le aao tusitusi, le susuga ia Ps Anthony Mauinatu ma le faletua.
Sa auai foi le Taitai a le ekalesia i Brisbane nei, le susuga ia Ps Frank Harder ma le faletua ma nisi faafeagaiga.
Ua tolu tausaga o faagasolo lenei tauvaga siva faaleagaga ua faaigoaina o le Elevate Youth Challenge. E 13 ausiva sa mataalia ma faia i ai le tauvaga ma e uigaese le mataina o taleni a alo ma fanau faapea tupulaga talavou.
Na sola le manumalo ma le ausiva pito i matutua o le tauvaga, le ausiva ua igoa o le Swagga Mama, na mauaina le $4000.00 ma le ipu. O le ausiva lea na matuai ofo le aofia i le maoa‘e o latou foi metotia na faatinoina ai lo latou sao.
O le tulaga lua na maua e le AOB e $3000.00 ma le ipu, ae lona tolu ai le ausiva mai Samoa o le United Uso na faamanuiaina i le $2000.00 ma le ipu. O le ausiva lea mai Samoa na manumalo i Sini ma Niu Sila i le faagasologa lava o lenei tauvaga o le 2012.
E tele kamupani sa lagolagoina lenei tauvaga e pei o le Primoz Motors ma nisi, ona o le lelei saunia o faailoga amaise le tapenaina lelei o mea uma. Na faamalieina ausiva uma i faailoga faapea foi ona fiafia tagata uma i le faaiuga a faamasino lea na avea ai le susuga ia Terry Fauea o le sui o le leitio o se tasi o faamasino o le tauvaga ma nisi sa feagai ma le tauvaga.
