E lei faigofie i faamasino le togiina o le tauvaga tautalaga a le fanau i le Aso Tofi ua mavae ona o le toatele o failauga sa tauva, mataalia o le sausau aemaise ai o le lelei o le tautala i le gagana Samoa.
E lua ni vaega na vaevae i ai le tautalaga a aoga, (1) Tausaga 5 e oo i le Tausaga 8 ma le Tausaga 9 i le Tausaga 13. O lenei faamoemoe na faataunuuina i le aoga a Kia Aroha College i Otara, ma o latou foi sa tapenaina lenei tauvaga faatasi ai ma le lagolago a le faalapotopotoga o le FAGASA i Aukilani.
Ua lua ai nei o tausaga sosoo o faatinoina i totonu o lenei Kolisi lenei tauvaga, ma o se fiafiaga sili foi i le pule aoga aemaise o le afioga ia Tuiavii Samuelu ma le aiga Samoa i le aoga, ona o le faia pea o lenei faamoemoe ua maua ai pea le avanoa e aoaoina ma faataua ai le Gagana Samoa i totonu foi o le latou Kolisi.
O le Tausaga 5 i le Tausaga 7 e silia i le 30 tamaiti sa tauva, ae sa filifili mai lava na o failauga e toalima i le tausaga e sili ona lelei, o le autu “Tautua ma le faamaoni mo sou manuia a taeao.”
O vasega maualuluga e iva aoga sa auai, St Mary’s College, De La Salle, Kia Aroha College, Alfriston College, James Cook High School, St Dominic’s Catholic College, Epsom Girls Grammar School, Rosmini College, ma Dilworth Senior Campus.
O le susuga i le faafeagaiga ia Sapati faapea le faletua ia Sia sa faamasinoina lauga a fanau laiti ae o le tofa ia Semanu F Ioane ma le tamaitai ia Fuafiva na faatautaia tautalaga a aoga maualuluga.
O vaega na silasila i ai faamasino mo le failauga, o le autu, fausaga o le lauga, momoliga, logo malie i le aufaafofoga, ma le Gagana. O se galuega e lei faigofie i faamasino aua e tutusa uma le tapenaga a fanau ma aoga taitasi aemaise ai o le molimau ma le faafofoga a matuā sa faatumulia ai totonu o le hall a lea Kolisi.
Na mae‘a le tautalaga a le fanau ona sosoo lea ma le taumafataga e vavae ai foe o lea aso, na saunia e faiaoga ma le kolisi a Kia Aroha ona lau ai lea o togi o i latou ua faamanuiaina i lenei tausaga.
O Tausaga 5 e 3 tamaiti na filifili mai ai, na manumalo ai Penelope Tanuvasa mai le aoga a Hillary Collegiate Primary, (2) Christianne Feilo mai le Sutton Park Sch, (3) Joseph Aiolupo mai le Robeston Road Sch. Tausaga 6 na manumalo ai Alofa Peni mai le Robertson Rd Sch, (2) Geonita Etuale mai le Sutton Park, (3)Adeline Eli mai le Hillary Collegiate Primary, (4) Sauasofarania Fepuleai mai le Sylvia Park Sch, (5) Elisa Sila mai le Papatoetoe West Sch.
O le Tausaga 7 na suipi ai Ethan Ugapo o Sutton Park Sch, (2) Auega Esau Bruce mai le McLaren Int Sch, (3) Jane Faasavalu Robertson Rd Sch, (4)Menelaus Ropati mai le Sir Doughlas Int Sch, (5) Luisa Faamaulalo mai le Holy Cross Papatoetoe.
O le Tausaga 8 na tulaga muamua ai Aunuua Lagaaia mai le Robertson Rd Sch, (2) Salma Asiata mai le Holy Cross Papatoetoe, (3)Siaana Iakopo mai le Sutton Park Sch, (4) Elizabeth Ulumani mai le Kia Aroha College, (5) Taufaanuu Feagaiga mai le Ferguon Int Sch.
Iuga o Tauvaga a Aoga Maualuluga
Tausaga 9 – (1) Jacqueline Aiga (James Cook High Sch) (2) Faith Ipiniu (Kia Aroha College).
Tausaga 10 – (1) Simon Puai (De La Salle), (2) Elaine Semu (Kia Aroha College), (3) na tutusa ai le toalua, o Catherine Siilata (James Cook High Sch) ma Joanina Tunai (St Mary’s College.
Tausaga 11 – (1) Atiae Eteuati (De La Salle), (2) Pearl Ipiniu (Kia Aroha College), (3) Sekuini Tanimo (Rosmin College), (4) Leu Timo (James Cook High Sch) (5) Theresa Leiataua (St Dominic’s Catholic College). Tausaga 12 – (1) Joe Nikolao (De La Salle) (2) Fuatino Leota (Kia Aroha College), (3) John Ralph (Dilworth Senior Campus), (4) Delilah Silva (James Cook High Sch). Tausaga 13 – (1) Leafa Maifala (Kia Aroha Colllege) (2) Katrina Seumanutafa (James Cook High Sch), (3) Precious Tusega (Alfriston Coolege), (4) Aukusitino Peato Ulugia (De La Salle).
Na momoli le faafetai o le fofoga o le aso le Tuiavii Samuelu i faiaoga ma a sui tauva mai aoga ona o le latou faatāuaina o le Gagana Samoa, le measina a le atunuu i totonu o aoga.
Ae lē gata i lea o le faafetai i le faalapotopotoga o le FAGASA i Aukilani ona o le fesoasoani i lenei faamoemoe e ala i faailoga ipu ma pine na saunia mo le fanau, ae faapea foi le lagolago a le Henderson Cars i le aso o le tauvaga.
Na afea foi i lea saunoga le faafetai faapitoa mo le mamalu o mātua e ala i le soosoo tau‘au ma faiaoga aemaise o le auai atu e molimau le aso o le tautalaga a le fanau aoga.
