Tauvaga faaakapela a autalavou SISDAC a Kuiniselani i le aso faapitoa o tupulaga talavou

E lei alo tamala tupulaga talavou e tusa o le polokalame o le aso faapitoa i le Aso Toonai, 2 o Novema sa tuufaatasia ai le matagaluega i le falefitu. Na taitaia sauniga o le taeao e le auofisa o le autalavou e ala i sauniga  i luga ole fata.
Na logomalie se feau faamalosi na fofogaina e le faletua o Imo Matai‘a o le taitai foi lea o le autalavou.
Na toe faamanatu le tāua o le salamō moni e pei ona ia toe faamanatu le tala i le uii faamaumau‘oa na ia fesiligia lona tamā i le vaega o lana ‘oa ae na iu ina uma ana mea ma aai faatasi ma puaa lea na ia filifili ai e salamō ma toe foi i lona tamā.
O se toe fafagu tāua tele ina ia iloa moni e tupulaga e tāua lava le aiga moni nai lo tuinanau o le olaga e leai se aogā ma pala o ‘ai a le matagi.
O le auofisa o le autalavou: Susuga i le faafeagaiga ia Foa Vaeluaga; Faatamā o le susuga i le Toeaina ia Setiu Iakopo Togipau; Taitai o le faletua ia Imo Matai‘a; Sui taitai o le  faletua ia Merry Vaeluaga; Failautusi o le talavou ia Kay Euese ma le sui failautusi, le talavou ia Matagi Levae. O i latou lava sa taitaia sauniga i luga o le fata.
O sauniga o le afiafi sa faatāuaina ai pesega faaakapela e faaaogāina ai siufofoga mālū e aunoa ma ni vaega faaonaponei e fefiloai ai.
E 7 autalavou sa tauva ma e leai se aufaipese na faaletonu ona o le matagofie o tapenaga e ala i musika mālie aemaise le tāua o upu o pese o loo momoli mai ai ni feau tāua.
Na sola ma le autalavou a Inala le manumalo i le togiga ma le pese ae e lē mafaamatalaina le logomālie o isi aufaipese uma e pei ona fai ai se vaega o tupulaga ma sui o latou autalavou.
O le taitai a le matagaluega SISDAC a Kuiniselani o le susuga ia Pr Lagolago (Falelatai)  & faletua ia Puataunofo Levae mai Saoluafata. E toafā faifeau o totoe i le taimi nei e aofia ai le susuga ia Pr Faamalologa & Tamara Fuesaina. Faafeagaiga ia Foa & Merry Vaeluaga faapea le faafeagaiga ia Luao & Imo Matai‘a.