Tauvaga aloha a le Ia Malamalama Agape Bible College i Papatoetoe

E lei iai se nofoa e avanoa o le town hall i Papatoetoe Tuai i le tumutumu o susuga i faafeagaiga ma o latou faletua mai ekalesia eseese aemaise o uo ma ē masani faapea aiga o i latou o loo aooga i lenei aoga Tusi Paia i le molimauina o le tauvaga aloha e pei ona faataunuuina i le po o le Aso Faraile ua mavae 16 o Aukuso.

O le susuga i le faafeagaiga ia Puleisea mai le Ekalesia Faapotopotoga a le Atua i Papakura na tatala aloaiaina lenei faamoemoe i le tatalo. A o le susuga i le puleaoga ia Charlie Reed na faafeiloaia le mamalu o susuga i faafeagaiga ma o latou faletua faapea le auvalaaulia na auai.

O le aufaipese o le Matagi mai Sasae ua loa foi le tautua i le atunuu i musika na tatalaina faafiafiaga o le po. E tele foi taaloga na saunia e faamatagofie ai le polokalame o lea afiafi. O le feulaina o paluni poo ai e muamua pa le paluni, o matematega o upu, faatasi ai ma siva mālie.
O le tāua o nei taaloga, e taulamua ai lava susuga i faafeagaiga ma o latou faletua, auā ua avea ai foi latou ma faataitaiga lelei i totonu o ekalesia. O le susuga i le faafeagaiga ia Tilaulelei o ia foi o se tasi o faiaoga o le aoga na saunia taaloga faapea le puleaoga ia Charlie Reed faatasi ai ma le fesoasoani a le susuga ia Mose o se tasi o sui o le aoga.

Ua ese mai le polokalame a le aoga i lenei tausaga mai le tele o tausaga ua mavae, ua faatinoina le tauvaga aloha ma ua avea o se polokalame e faamasani ai le isi uso i le isi uso, faapea foi le aufaigaluega a le Atua. O se tasi vaaiga tāua i lea afiafi o le nonofo fefiloi o faafeagaiga ma le auvalaaulia.

Na sosoo ma le taumafataga na saunia ma tapenaina lava e le susuga i le Puleaoga ma le faletua faapea le laumua o le Ia Malamalama Agape Bible College. Na taualuga faafiafiaga o le po i le aitema a le auuso o le fitafita tau, ua faaigoaina “Somebody Touch Me” ma faagasolo ai loa le tauvaga aloha.

Na muamua i laei o tamaitai, ona sosoo lea ma alii, ae taualuga ai loa i le tauvaga pea a ulugalii. O faamasino o le tauvaga, o susuga lava i faafeagaiga sa auai faapea o latou faletua. Na faaiu le polokalame o le po i le faafetai a le susuga i le puleaoga i le aufaigaluega a le Atua na auai faapea le mamalu o le atunuu na afifio atu ma lagolago i le faamoemoe o le aoga e pei ona faatinoina.

O le au gasese sa nafa ma le tapenaina o le taumafataga

Ulugalii na auai i le tauvaga pea a le Ia Malamalama Agape Bible College