Tauva Sooalo Setu Mua mo le Manukau Ward

Immigration_new

Na faailoa aloaia mai e le Taitaifono o le Auckland Future, Peter Tong le filifilia o le Tofa ia Sooalo Setu Mua ma sui tauva mo le itumalo o Manukau ile palota a le Auckland Council ile masina o Oketopa.

O le filifilia o le tofa ia Sooalo, ina ua lē mafai ona tauva le faletua ia Christina Atoa Tapu ona ua faataotolia ile falaefu. E pei o upu a le atunuu, e soo le fau ma le fau.

Ua lē mafai ona tauva le faletua ia Christina, ae ua filifila se tasi o tamalii iloga, ma ua lausilafia foi i lana tautua mo Samoa i Niu Sila nei, e tausinio mo le palota.

Ina ua fesiligia le tofa ia Sooalo mo sona finagalo e tusa ai ma le filifilia o ia, na ia ta‘ua ai lona agaga fiafia ona o le avanoa.

E nisi o vaega oloo taulai iai le vaai a le Auckland Future o le taofia lea o le siitia pea i luga o le totogi o rates, aemaise le tilofaia o auala e fesoasoani ile faafitauli tele ua aafia ai nei Niu Sila aemaise lava Aukilani, o le utiuti lea o fale.

Na ta‘ua e Sooalo o le siitia o rates e manatu māmā iai le toatele, aemaise i latou oloo nonofo mautotogi i fale rent, peitai, o le siitia pea o rates i luga, o le siitia foi lea o le totogi o fale rent, o se tulaga e tatau ona tilotilo toto‘a iai.

E mafai ona tusilima ma sa‘i ile Malo, peitai, e iai foi le sao o pulega faaitumalo ile faafitauli oloo tulai mai nei ile utiuti ma le taugata o le totogi o fale.

O le tofa ia Sooalo ose tamalii ua iloga lana tautua, e pei ona taulamua ai ile fesoasoani sa tuufaatasia mo Cyclone Winston, o le sailiga tupe e fesoasoani mo le Maketi i Savalalo na aafia ile afi.

E lē gata i lea ae o le faamaopoopoina o le Walking Samoans, lea ua faasopolia ai pitonuu uma o Aukilani ua avea o se sootaga mo tuaa sinasina faapea le atunuu lautele, e ala lea ile savali faamalositino.

Ile itu tau galuega, o le tofa ia Sooalo oloo ia umia le faailoga ole Bachelor of Education mai le Massey University. Ose tasi foi sa iai ile pulega ma le faafoeina o le aoga a le Martin Hautus, o le poututoa foi o le asosi o tama ma teine tuai o le SCOPA i Niu Sila.

Sa galue foi mo le matagaluega o Faamasinoga ile tapenaina ma le faatautaia o polokalame faaleaganuu mo le toese i Mt Eden faapea le toese o tamaitai i Wiri.

Ile taimi nei oloo galue foi faakonekarate mo le Entrust, faapea le Auckland City Council ma le matagaluega ole Soifua Maloloina.

O le tofa ia Sooalo ma le alii Tonga ia Ika Tameifuna, o Sui tauva ia o le Auckland Future mole palota faaitumalo a Aukilani mo Manukau Ward.