Tauvā Seugamalii Josephine Tuuga Aufa‘i mo le Division 2 a Logan City

Ua leva  ona tapena ma sauni Seugamalii Josephine Tuuga Aufa‘i e tamoe e fia avea ma Councillor o le Division 2 a Logan City lea e afia ai Woodridge, Underwood, Logan Central ma Kingston (Independent Candidate).

O le itumalo o Logan City, e tele ituaiga gagana, aganuu o le ala tonu lea e fia tamoe ai lea alo o le atunuu ona e telē se miti ma se tamaoaiga e fia faasoa mo tagata lautele o le pitonuu o Logan City aemaise nisi vaega tāua e fia faailoa ai lona agaga fesoasoani.

Na faia le feiloaiga o aiga ma uo i se taumafataga i le Aso Faraile na tea nei e tapena ai mo le palota i le aso 19 o Mati o le tausaga nei.

A o alo atu mo le faigapalota, e lē o toe mamao se taimi ona faalauiloa lea pe faapefea ona resitala ma fai le palota mo le silafia e tagata lautele o le itumalo o Logan City ina ia lagolago le faamoemoe o Seugamalii Josephine Aufai.

O ona tuaa o le susuga i le Toeaina ia Rev Alapati ma le faletua ia Sarai Tuuga Stevenson ua loa foi i le galuega a le Atua (Safune ma Laulii Samoa).

Na auai mai uma ona tuagane ua lauiloa i le Five Stars i lona faamoemoe i le Aso Faraile ua tuanai. Sa auai susuga i faafeagaiga, malo faaaloalogia ma sui mai le community. O le fofoga o le aso o Councillor Steve Swenson (Logan City Division 3).

O Seugamalii Josephine Aufa‘i, ua 12 tausaga o galue o ia o se Project Manager i le aoga Woodridge SHS, sa avea foi o se Scripture Union o le organisation Chaplain  avea ma faauluuluga i totonu o Logan City (tagata la ei totonu o Logan).

Sa galulue ma si ona alii le susuga ia Tala Aufa‘i i le galuega a le Atua, peitai ua iai se miti e fia fesoasoani mo tagata Samoa ma tagata Pasefika ma soo se tasi lea ua ia manatu  ai  e fia laasia se tasi o matālalaga o lona soifua o lana tautua lea mo ona tagata faapea le lautele o le pitonuu o Logan City.

E lata i le 38,000 tagata o loo aumau i le pitonuu o le a tamoe ai ae 16,000 e mafai ona palota.

Faafofoga ia Seugamalii Josephine Aufa‘i i le po o le Aso Lulu, 27 o Ianuari i le 9:45pm  i le alaleo a le (Switch1197am, polokalame a le Penina o Asuisui 1197am) . O le a faalautele ai ana anavatau a o sauni e tamoe mo le Councillor Divison 2 a Logan City i le masina o Mati.