O le taimi muamua lenei o le a tauva ai se au siva Hip Hop mai Samoa ile tauvaga siva tele e faia ai ile Vodafone Telstra Manukau ile po o le aso tofi nei 19 o Aperila. O le aso faraile na tea nei na tuua ai e le ausiva lenei a le Toa le atunuu ae malaga atu i Niu Sila mo lenei faamoemoe tele. E lua vaega o le a faagasolo ai le tauvaga siva lenei a Niu Sila, o le vaega muamua mo na’o ausiva lava a Niu Sila e saili mai ai le ausiva siamupini e malaga atu ile tauvaga siva Hip Hop a le lalolagi e faia ai i Amerika ile tausaga lenei, ma le vaega lona lua e faapitoa lava mo na’o ausiva mai le Pasefika lea e tausinio ai Samoa, Fiti, Toga ma Cook Islands e saili mai ai se ausiva e manumalo ai ile Pasefika mo le avanoa e tauva ai ile tauvaga lenei i Amerika.
E pei ona silafia o le ausiva a Samoa ua filifilia mo lea tauvaga i Niu Sila o se tasi o ausiva na manumalo mai ile tauvaga siva a le TV1 lea na faia ai ile amataga o le tausaga lenei ile masina o Ianuari.
O tausaga taitasi lava e amata ai le tausaga ile tauvaga siva lenei a le TV1 e faaigoa ai o le Samoa Best Dance Crew, ma o le ausiva a le Afioaga o Vaiala le Army of Kings na sola ai ma le siamupini o lenei tausaga lea foi na filifilia ai e fai ma sui o Samoa ile tauvaga lenei ile po o le aso tofi nei, peitai na manatu le pulega o lenei ausiva e ao lava ona o latou filifili ai nisi o tama lelei mai i isi ausiva e auai ai ile ausiva lenei ona o se tauvaga maualuga tele aemaise o le tauaveina o le igoa o Samoa. O le masina o Fepuari na amata tapena mai ai lenei ausiva, ma na maua ai foi le avanoa e malaga mai ai nisi o alo siva iloga o Samoa mai Niu Sila ile masina na tea nei e fesoasoani ai ile tuufaatasiga atoa o lenei taumafaiga.
O lo o faatupe atoa lava e le TV1 le amalaga atoa lenei ma le faamoemoe o se avanoa taua tele lenei e faalauaitele ai le tomai o alo ma fanau a Samoa i lenei taleni. E 17 le aofa’i atoa o lenei ausiva faaopopo iai ma sui e to’atolu o le TV1 o lo o malaga faatasi ai i Niu Sila. Na maua le avanoa e feiloai ai lenei ausiva ma le taitai o le atunuu le Afioga ile Alii Palemia, Tuilaepa Lupesoliai Sailele Malielegaoi e pei ona ave iai le faamanuiaga mai le Malo ao lei tu’uvaa atu mo Niu Sila.
O se tasi o faamamafa a le taitai o le atunuu na ia saunoa ai, ia faataua le avanoa ua maua aemaise o le amio pulea ao malaga ai i Niu Sila. O upu foi nei na apoapoa’i ai le tamaita’i pule o le TV1 le Afioga ia Galumalemana Faiesea Matafeo.
I le faamavaega i le malae vaalele i Faleolo na tumutumu ai aiga o fanau nei na aga’i atu e faaalia ai le lagolago ile taumafaiga maualuga ua oo iai le fanau, aemaise o se uluai taimi o le a tauva ai se ausiva mai Samoa i tauvaga tetele faapenei i Niu Sila, saunoga lea a se tasi o tina o lo o malaga ai lona alo ile ausiva a le Toa. E tele nisi nofoaga i Niu Sila o le a mafai ona asiasi ai lenei ausiva ao lei amatalia ai le tauvaga ile aso tofi nei e aofia ai ma le asiasiga faapitoa ile Televise a Maori.
O lo o ave le faamuamua a le ausiva a le Toa ile tauvaga ile aso tofi nei ina ia manuia ai a latou taumafaiga ona faatoa autilotilo lea ile tauvaga tele i Amerika. O lo o iai le faamoemoe a maea le tauvaga ile aso tofi nei ona toe malaga uma mai lea i Samoa ile aso sa nei lava.
