Ua uma ona faamavae atu si alii aoao o Pula ia Luama, ona mei teisi lea i tua ae faasolo atu pea Luama i isi tagata, seia oo ina ua tu nei le teine i luma tonu o ona mātua, e sauni e faamavae atu i ai.
Ua tagi masusu le teine, ua taufai togi uma ane ai ulu o isi tagata faaeevaa ia e laulaututū, ae ua leai lava mā Luama i lana tagi tautala lea ua amata nei. ‘Ta-mā, Ti-nā, hu-hu-hu, ua ou le fia alu; ua ou le fia alu.’ Ua tago mai le fafine ma fusi mau atu si ana tama, ma la fetagisi ai lava, ae o si faifeau lenei ua taumafai e faatoatoa lona toalua, ma ua lolofi uma ane foi i ai ma isi o le latou aumalaga.
Ua aapa mai le tina o Pina, ua taumafai e faalagolago atu le ulu o si fafine o Puna i lona tauau, leaga o lea ua matua mamafa lava i le tauau o si teine o Luama, ma ua tau amata ai foi ona susu ifo i loimata o le fafine le ofu o si ana tama lea sa faamafolafola lelei mai e si ona tina i le fale. “Tinā, lototele ae tuu si au tama e alu o la ua valaau mai le pasese, ae tatou talosia aoga a Luama ia iu manuia toe foi mai ai.”
E moni lava foi i isi faaeegavaa o loo fetagisi ai foi isi ma faamavae i o latou aiga, ae foliga o le faaeegavaa lava a le alii faifeau ma lona aiga lea ua sili ona mataina ai foliga faanoanoa uma o tagata. Ma na tasi lava foi le mate a le toatele na iai i lea aso, atonu o se teineitiiti o le a alu e aoga fua i le fetagisi umi o lona aiga, aua ana faapea o alu e tafao, semanu e leai ni lauega faapea.
O le mea moni lava, ua oo i isi tagata e le iloa le aiga o le faifeau, ua tei lava ua susu mai ai ma o latou loimata o tilotilo ane i le fetagisi a le teineitiiti ma si ona tina, ma ua iloa uma ai lava e lenei anoano o tagata, o le pele lea a le ulugalii. O Talivai foi e le o se tamā e tagi gofie i ni taimi faapea, ae i le taimi e tasi o loo taumafai e tuu ese mai le faletua mai si ana tama, ae o loo maligi lava foi loimata o si toeaina a o taumafai atu ana upu faamalosi i si ona fafine.
Ua opo atu e si toeaina si ona afafine ma faamavae loa i ai ma faatonu loa e alu i totonu ma toe faamautinoa lelei ana pepa i leiloa se mea. O le teine i lea taimi, ua matua puaoa atoa lana vaai i ona loimata, ua toetoe ai lava a sulu ona e fai o lana tamai atopau o loo toso i lalo, ae o loo asoa foi le isi ato, ma isi tagapepa ia na faatoa toe tuu atu i ai i le malae vaalele, o ni tagapepa meaalofa.
