O le Aso Lua o le vaiaso nei, aso 15 Mati o le a amata faatauina atu ai i tua mo le taimi muamua le vaega lua o le ata tifaga o le Tautoga Gausia. Ua faaautuina i le Faamagaloga – Forgiveness.
O lenei ata tifaga na pueina lava i totonu o Samoa, faatinoina e tagata Samoa, faatasi ai ma le faaaogāina o le gagana Samoa. Ua faamaonia mai e se tasi o Faatonu Sili o le South Seas Pictures i Samoa, Taufau Faatafa Faumuina Aukuso, le mae‘a ai o le tapenaina o le vaega lua o le Tautoga Gausia, mo le maimoaina e le atunuu ma le lautele.
Na iai le faamoemoe o le masina o Fepuari o le tausaga nei e faatau atu ai i tua lenei ata peitai, ona o le tulaga louloua o le tau i Samoa i tafega ma matagi e pei ona silafia na aafia ma lapataia ai Samoa, o le mafuaaga lea.
Peitai, na faaalia le agaga faafetai tele o le pulega a le South Seas Pictures i Samoa, ona o le lava papale o le mamalu lautele o le atunuu, auā e lē taupuleina e se isi le tulaga o le tau, aemaise lava o taimi masani ia e louloua ai le tau i Samoa.
E lē o se galuega na faigofie, o se galuega e faigata tele lona tuufaatasia, peitai e lei ‘alo i le ata o le niu le Pulega, ina ia tausisi pea i lana sini autū, o le gaosia lea o ata tifaga Samoa mo o tatou lava tagata, aemaise o ni avanoa e maua ai nai galuega mo nisi o le fanau o loo iai nei taleni, peitai e lē o maua ni galuega i Samoa.
O le vaega muamua o lenei ata e pei ona mae‘a ona maimoa i ai le toatele o le atunuu, na iloatino ai le leva ona faatali o o tatou tagata Samoa i ni ata tifaga ua mafai lava ona faia e o tatou tagata, aemaise o le faaaogāina o le tatou lava gagana, e pei o ata Filipino, Initia ma nisi, ua tele ina maimoa ai tagata Samoa.
E talitonu ua matuai toatele lava i latou o loo faatali nei i le sosooina o lenei ata, e tali ai le tele o le mau fesili a le au maimoa.
E pei lava o le tele o ata tifaga o loo iai nei, e faia lava e le tagata maimoa lana faaiuga i le vaega e oo i ai le ata tusa lava pe lei mae‘a ona maimoa i ai, ae a oti le tama poo le teine e autū i ai le ata ona ita lea, ae a iai foi se vaega o le ata e manao e tuu i le mea la e manao i ai lana matamata, e faapea foi.
O se tulaga e masani ai le au maimoa, e pei foi la ona faia i le mae‘a ona maimoaina e tagata o le vaega muamua o le Tautoga Gausia. E ui i lea, na faailoa mai e le Pulega, o finagalo faaalia, o le finagalo lava lea o le tagata lava ia peitai, e faaaogā lava na o le finagalo e talitonu e maua ai se alu alu i luma o le kamupani i ana taumafaiga, ae o le fili ma le pola motu i tua, o le a lē faaaogāina ma maimau ai fua le taimi.
E pei ona silafia o le uluai kamupani pueata tifaga lenei a Samoa ua lesitalaina faatulafono i Samoa, ma ua lagolagoina e le Malo Samoa lenei taumafaiga, lea foi e pei ona foai ai se tinoitupe e tusa ma le $50,000 tala, e fesoasoani i lenei tapenaga tele. E talitonu o se vaiaso pisi lenei mo le Samoa Video Centre i Otahuhu auā le faatauina atu o le Tautoga Gausia i lona vaega lua.
O loo agai pea i luma taumafaiga a le South Seas Pictures i Samoa, o le Aso Tofi o le vaiaso ua mavae na amata faasalalau ai avanoa mo le isi foi ata tifaga fou a le kamupani, i nisi o le a faatinoina, e pei foi o le Tautoga Gausia.
O lenei ata ua faataatia ma tapena o se ata faasolo, ma e tusa i le 10 ni vaega eseese o le a amata pueina ai i le masina fou i Samoa.
Na faailoa le agaga faafetai tele o le tofa ia Tanupo Fiu Fogalevai Aukuso ma le tausi ia Taufau, o i laua ia o loo faauluulu i ai le kamupani pueata a le South Seas Pictures i Samoa, ona o le tele o le lagolagosua i Samoa, e lē gata i kamupani, ae faapea foi i le Malo ma le lautele.
O le faafetai faapitoa i le SamoaTel, Le Fiafia Accomodations, Apia Rentals, Tanu Beach Fales aemaise le Malo o Samoa, o i latou ia o Major Sponsors faapea nisi o kamupani lagolago o le a faailoaina i luga o le ata, i le fesoasoani malosi i le tapenaina o le Tautoga Gausia – Vaega Lua.
A o tapena atu ai nei le South Seas Pictures mo le faalauiloaina o le Broken Promise Part 2, ae ua tapena ai foi le Matagaluega o Leoleo i Samoa i ni tusi saisai mo nisi o faleoloa i Upolu ma Savaii faapea Fale hire video ma tagata taitasi, lea ua faamaonia le faia faagaoi o kopi ma le faatau faagaoi o le vaega muamua o le Tautoga Gausia.
E lē gata i lea, e faapea foi i atunuu i fafo lea e matuai sili atu le tele o kopi na faia faagaoi ai i totonu o Ausetalia, Amerika ma Amerika Samoa, ma o le a matuai mataituina e nisi ua atofaina faapitoa e le kamupani ina ia molia i le tulafono, e aofia ai ma Niu Sila nei.
Talu ai e lē faigofie nei tapenaga, ma o le a faatauina atu ai lenei ata i le $35 tala i Niu Sila.
