O le tāua o le onosai ma le lava papale, e lē gata ina faaeaina, ae o se mafutaga foi lea e mautu ma mauaa ai le fatu sa totōina, ua pua‘ina mai ai le alofa ua moni, ona ua lava le silafia o le tasi i uiga o le isi.
E ui ina ifo vanu ma a‘e mauga i le felavasai o le fili ma ana mailei o le soifuaga peitai, o lele ua manino le mata o le vai sa faanenefu i masalosaloga faivavale i tafaoga a tama ma teine.
Ua savalia nei le fitu tausaga o le mafutaga a le susuga ia Selefuti Anesone ma si ana manamea, le tamaitai o Oina Amiga, ma ua tonu ai le la filifiliga, o se taimi talafeagai lea ua tatau ona faagata ai matematega o mafaufauga ina ua tini i le taunuuga le vaa sa tau alo mai i le afe o maila ma le tele o tausaga.
O le ta tonu o le lua i le Aso Toonai na tea nei, na molimauina ai e le fia selau o aiga ma uo faapea le Ekalesia EFKS a o fefaasoaai mafaufauga e ala i loifofoga o le fiafia e osia ai le feagaiga ina ua faapaiaina i luma o le Atua.
Na gagana le susuga ia Selefuti i ni ana fātuga, “Sau ia oe Oina lo‘u Au”’, uo lē sa ou filifilia i lo‘u mafaufau, o oe lava o le Susana i Vanu ma le maasoama i le ogatotonu o lo‘u fatu”. E faapena foi Oina ua na o le faamanū ma alaga, “E moni, E lelei lava Ieova o ‘Au.”
Na taitaia le sauniga o le faapaiaga e le susuga i le Toeaina o le Pulega EFKS a Saute i se upu apoapoai e saga faamausalīina ai pea le alofa moni.
O se saunoaga foi a le failauga, o nisi nei o talavou e maualuga le tapulaa ma le soifua a‘oa‘oina i itu faaleagaga ma tausaafia i o la uiga.
O se mitamitaga foi i le toeaina ma le faletua, ona o nisi lava o nei alo ma fanau o ni mamoe lava a le susuga i le Toeaina ia Tauaaga ma le faletua ia Senerita ua leva ona faafailele mai, ma o se uluai faaipoipoga lea ua tatalaina lo latou maota faato‘ā mae‘a ona faaulufaleina.
O le faanaunauga foi o le taitai ma le lu‘i i tupulaga talavou uma ina ia uia ala o le Alii.
O tuaa o le faatoanofotane, o Lagilili Amiga mai Vaipuna, ma le tofā ia Tumaumaali Amiga mai Samamea i Fagaloa.
O mātua o le faatoafaiavā o Tafaoimalō Anesone mai Saleaumua ma Satalo, ma le faletua ia Pito Anesone mai Mutiatele ma Sapapalii i Savaii.
O loo galue le tamaitai o Oina o se legal secretary ia Holand & Holand Solicitors, faapea le susuga ia Selefuti o se alii faamoemoeina o loo galue ia Coles.
O le susuga ia Simanu Laufale sa fai ma uosili a le alii faaipoipo, ae o le uso o Oina mai Kalefonia i Amerika sa fai ma ana uosili, le tamaitai o Te‘i Amiga, faatasi ai ma aumea mamae e toafitu.
Na see atu i le nofoaga e alo ai mo le taumafataga pe tusa o le 4 i le afiafi lava lea, ma o le auga foi lea o le aso, ole taliga ole sua.
O le uso lava o le tamaitai faaipoipo ia Alice Amiga Tiumalu sa fai ma fofoga o le aso, ae fai ma sui o aiga na lua le tofa ia Mautu Amiga e faatautaia faaaloaloga auā le paia i le aufaigaluega faafeagaiga ma Samoa uma na potopoto.
Manuia le aiga fou Selefuti ma Oina Anesone!
