E ese foi lagona na oo iai le faatoafaiava ia Esoto male faatoanofotane ia Sia ina ua osia le tautinoga i luma o tagata faapea le silafaga ale Atua, ole la mafutaga faaleulugalii e leai se isi e mafai ona faateateaeseina seia vaganā lava le oti. O nei tautinoga na osia lea ile sauniga paia ole faaipoipoga ile malumalu ole Ekalesia VOC i Magele ile afiafi ole Aso Toonai 17 o Setema ele susuga ile faafeagaiga ia Toamata Sione.
Na molimauina e aiganalua amaise sui o aiga na malaga mai Ausetalia ma Samoa, faapea uo ma ē masani ua fai ai foi i latou ma molimau ola ile ioe ole alii o Esoto ma lona faletua ia Sia ua tino e tasi i laua i luma ole Atua i lenei sauniga.
Ole tumutumuga o nei mea uma ole upu faauuina ale Atua na mānavaina lea ele susuga ile faafeagaiga mai le Ekalesia Worship Centre mai Samoa ia Misa Ioane Esoto, ma ua fai lea ma maea sautua tolu e fusia ai le mafutaga ale ulugalii fou ma avea ose faavae fou ole aiga. O lagona ma loimata ole fiafia sa iai tagata uma i lea aso ina ua mafai ona faataunuuina male manuia le aso fiafia ole ulugalii fou.
Na faaauau polokalame ile Manhattan i Mt Roskill ile afiafi auā faafiafiaga a aiga na lua faatasi ai male taumafataga. Ole tofa ia Ili Fale sa fai ma pule ole tausamaaga ma o ia foi sa nafa ma faaaloaloga mole mamalu ole auvalaaulia.
Sa matagofie foi ile faalologo ale auvalaaulia molimau a mātua i olaga ole fanau, e pei ona saafi ai le faletua ia Paese Letele ile olaga usitai ole atalii ia Esoto male galue malosi i totonu ole latou aiga aemaise ai ole galuega ale Atua, ae pese fiafia foi le tamā ia Matamua Pulefou ma faailoa le olaga usitai male filemu ole tamaitai o Sia i totonu o lona aiga.
O Esoto ole alo ole susuga ile faafeagaiga ia Tauiliili Pio Letele male faletua i Paese Letele mai le afioaga o Satuimalufilufi ma Lepea, ae ole tamaitai o Sia ole alo ole tamā ia Matamua Pulefou male tausi ia Tuutuu mai le afioaga o Salelologa ma Gataivai.
