Tausisi le Taupou i lana Siva Faaleaganuu e pei ona faavae mai ai

Nisi o fanau tamaitai oloo aoaoina ile faatinoina ole siva taupou
Nisi o fanau tamaitai oloo aoaoina ile faatinoina ole siva taupou

Oloo i Aukilani nei le afioga ia Tuifaasisina Korina Seiuli Lee mai le afioaga o Papauta, Apia, Solosolo, Faleasiu, Papa Sataua ma Saasaai e faasolo se polokalame poo ni semina e ala lea ile aoaoina o tupulaga talavou tamaitai mai le 3 tausaga agai atu i luga ile 17 tausaga ile faatinoina ole siva faataupou ale tamaitai Samoa.

E pei ona maitauina ele afioga ia Tuifaasisina Korina Seiuli Lee lenei vaitaimi, ile suiga fou ua iai le faatinoina poo le faiga ole siva ale taupou pe a oo ina siva ile saoasaoa o pese oloo faaaogaina, aemaise ai ole siva ale tamaitai ile pese palagi ae lē gata i lea ole soona tātō vale ma le tafitifiti solo ole taupou pe a oo ina siva, ma e iai lona lagona o nei suiga fou ua tauau ai ina mou atu ai le matagofie ma le mamalu ole tapou pe a oo ina saasaa ma sausaunoa i lana siva Samoa.

I lona toe lalagaina ma le fafaguina ole tāua ole gaioi ale taupou pe a oo ina siva, ua ia faasoa ai lona malamalama ma lona iloa i nei fanau laiti tamaitai ina ia mafai ona latou iloa le uiga tonu ole faatinoina ole siva ale taupou Samoa.

Ole afiafi ole Aso Tofi ma le Aso Faraile ole vaiaso ua mavae na faatinoina ai loa lea faamoemoe ile community hall i Avondale ma sa maitauina ai le agai atu o mātua aemaise lava i tina ma avatu a latou fanau teine e aoaoina le faatinoina ole siva ale Taupou Samoa e pei ona amata ai ile tele o tausaga ua mavae.

E pei ona saunoa le afioga ia Tuifaasisina Korina Seiuli Lee, e iai nisi o mātua e avatu a latou fanau ona mananao lea ia a‘o loa le siva ma maua; ae e leai, o lana galuega e amata lava ile aoaoina o fanau i mea faigofie, e pei ole faiga ole see, ole faavavaiina o tamatamailima, ole migoi ole tino ole tamaitai ma faasolosolo atu ai lava ile atoatoaga ole siva ale taupou lea e aofia ai ma le faatinoina ole nifo oti ma le paluina ole ‘ava, faatasi ai ma le aoaoina foi ole amio ale tamaitai e pei o lana tautala, savali, nofo, auā e iai le isi teneititi e lelei mai le siva ae faaletonu le amio, ae ua ia taumafai e aoaoina le siva ma le amio ina ia mafai ona maua uma ele tamaitai Samoa le tāua ole siva ale taupou Samoa ma lana galuega faatino.

O nisi o ana aoaoga mo tamaitai i Apia oloo faatinoina lea i Aso Toonai o vaiaso taitasi auā o aso ole vaiaso oloo tuatuagia ai fanau i aoaoga. E savali ile fā ile lima masina e faatinoina ai lenei polokalame mo fanau ma ua ia vaaia ai loa faatasi ma mātua se tulaga maualuga ua oo iai lo latou taumafai, ma oloo ia faaaogaina foi gagana e lua i ana aoga ile Gagana Samoa ma le Faaperetania e aoaoina ai fanau.

Ole tausaga 1999 na faavaeina mai ai e Tuifaasisina Korina Seiuli Lee lenei aoaoga i Amerika Samoa i tamaitai e 20, ma ose misiona lea mo ia ina ia mafai ona ia faalauiloa ai le siva Samoa ale taupou ma ia faapelepele ai o tatou tagata mo le isi augatupulaga oloo fai mai.

Na alua‘i, alua‘i lenei polokalame ma ua ia vaavaai ai ile naunau atu o mātua e uunai a latou fanau ile aoaoina ole siva moni ale taupou, ma ua silia ai ile 4000 fanau ua auai. Ole taimi nei ua lua isi kulupu a Le Taupou-Manaia ua iai, e tasi oloo i Orange County California ma le isi tasi oloo i Apia Samoa.

O Tuifaasisina Korina Seiuli Lee, na faauu mai ile Kolisi o Samoa ile 1987, ma o ia foi na faavaeina ma onaina le ausiva a Le Taupou-Manaia, ma o ia lava oloo a‘oina le fanau tamaitai ile faatinoina ole siva faaleaganuu Samoa.

O lona tupuaga, e tupuga mai ise aiga e iloga ile tomai tau musika, Le Aiga ole Ausalamo, ose alo tamaitai (granddaughter) e faasino ile tina ia Netini Matautia Leaupepe Solomona-Lee mai Apia, Papa Sataua ma Faleasiu.

Ose tamaitai e telē lona sao sa ia fesoasoani ai i nisi o tamaitai sa avea ma Miss Samoa, Miss American Samoa ma Miss South Pacific e ala ia latou taleni, o a latou Siva Samoa, aemaise lava ile faatinoina ole siva ile vavai ma le faamaliuliu ole siva ale tamaitai Samoa moni.

Sa avea foi ose faamasino i nisi o tauvaga ole Teuila i tausaga ua mavae ile faamasinoina o siva moni Faaleaganuu, le Mamanuina o teuga moni ale taupou Samoa, ile faaaogaina o a tatou Tuiga fafau poo le Tuiga moni ale Taupou Samoa e 4 ona vaega.

Ole 2004 na sili ai le ausiva a Le Taupou-Manaia mai Amerika Samoa, ose uluai taimi ma e na‘o le pau foi lena ose ausiva mai le motu i Sasa‘e na mafai ona manumalo ise tauvaga siva i Apia, ile tauvaga siva faaleaganuu mo le Teuila Festival a Apia, ma e na‘o latou lava le ausiva e aupito sili ona laiti le fanau teine sa sisiva ai.

Ole 2005 sa fai ai i latou ma sui o tagata Samoa ile Setete o Hawaii e faafiafia ile faamanatuina ole Centennial Celebration ale Setete o Hawaii, ma na faalauiloa ai lava ele Pulenuu o Hawaii lena aso 8 o Iulai e faapea, ole Aso o Le Taupou-Manaia (Le Taupou-Manaia Day).

Ma o Le Taupou Manaia oloo mafai ona faafiafia ia latou Malaga taamilo oloo alu i Hawaii, faapea Amerika, o Samoa, o sailiga tupe ale malo o Samoa ma Amerika Samoa, o tauvaga Miss Samoa, tauvaga Miss American Samoa ma le Miss South Pacific ma Sisigafu‘a oloo faafiafia ai. Ole tausaga fou lea ua fuafua ai le isi aumalaga mai Amerika Samoa ole a mafai ona auai mai e faafiafia ile Polyfest a fanau aoga, faatasi ai ma le Pasifika Festival e pei ona masani ai tausaga taitasi.