Oloo faapotopoto nei i Aukilani le ‘au Fencing a Samoa. Ole taaloga lenei e pei ole tauga pelu. Ole ‘au oloo taitaia ele Afioga Tuiloma Walter Lee Imo. E toavalu tama ma teine ale Fencing Samoa ole a tauva ile taamilosaga ale Oceania Fencing Federation.
Ta‘ua e Tuiloma, “E fou lenei taaloga ia te au, na‘o faataitaiga na faatautaia ele faiaoga mai Adelaide lea na ou aoga ai e lua aoga na fai. O tomai na ou mauaina mai lea aoga ole tomai foi lea na amata ai le kalapu i Samoa.”
Na ia ta‘ua foi, “E matuā fou nei mea uma ile ‘au, e fou le taaloga, e fou mea taalo, e fou le taamilosaga.”
Ta‘ua foi e Tuiloma, o lea faatoa amata le kalapu i Samoa, e leai la ni matatia maualuluga o taulai iai le vaai i lenei taimi, pau le naunautaiga i lenei taimi, ole maua lea ose aoga lelei mole lumanai ole taaloga i Samoa. Peitai, e iai foi le faamoemoe ale susuga ile faiaoga, e tatau pea ona maua se ‘ai o Samoa i lenei taamilosaga, ae e lē na ole faatumu ai o fuainumera.
O Samoa ole atunuu muamua lea ile Pasefika ua ofi atu i lenei taaloga. Na ta‘ua foi e Tuiloma le manaomia o lenei taaloga e atunuu e iai Tahiti, Amerika Samoa, Fiti ma Guam.
Ole taamilosaga ale Oceania U20s oloo faia lea i Lower Hutt, Wellington.
