Ua faamaonia nei, o le alii o Cameron Brown, o loo tulaga muamua i Niu Sila i le Ironman ma o ia foi sa iai se taimi na Numera 1 ai i le Lalolagi i lenei lava tuuga, ae o le taimi nei o loo Numera 2 i le Lalolagi, ae o lea ua fuafua o le a auai i le Samoa’s Half Ironman, lea ua fuafua e amata i le Aso Toonai, 10 o Aukuso 2013.
O le tuuga Half Ironman e aofia ai le 2km aau, 90km tietie uilavilivae ma le 21km tamoe. Ma e iai le faamoemoe, e mafai e Cameron Brown ona ia ausia uma lava na vaega uma e tolu o le tausinioga, i le sili itiiti atu lava i le 4itula.
Ae a tuu i se faitauga ma‘oti, e mafai ona ia faamae‘a uma na vaega e tolu i totonu o le 4itula 10minute pe 5minute foi minutes.
E ui lava ua faaletonu nei le tulaga o loo i ai le atunuu, ae lei toe maua mai se isi faaaliga pe iai se suiga o lenei tausinioga. Faailoa le fiafia tele o le alii o Brown i lona auai i le tausinioga a le Samoa Half Ironman, aemaise o le a maua ai se avanoa foi e tausinio ai ma isi foi tagata iloga i le lalolagi i lenei lava tausinioga.
O lagona fiafia foi lena o le susuga Seti Afoa, o ia o le faatonu o le Samoa International Events (SIE), o ia foi na valaauliaina le alii o Brown ina ia taimua i lenei tausinioga i Samoa, ma faamaonia ai le talia lelei e Brown o le valaau a le faatonu.
O se ausiga tele foi lea, i le mafai e le susuga Seti ona maua le ioega mai ia Brown e tauva ai i Samoa, o se avanoa e lē faigofie ona maua.
Pe afai e oo atu i lena taimi o loo iai pea fuafuaga na muai faataatitia mai, o le vaiaso lava lena e fai ai le Half Ironman event, o le a talimalo ai foi le SIE i le taamilosaga tuuga aau, le Samoa Swim Series ma le Pacific Open Water Championships mo le 5km ma le 10km.
O isi polokalame o le a faatulaga foi mo le 2013 e aofia ai le Adventure Racing ma Steve Gurney ma Nathan Faavae, le tuuga Stand Up Paddle Board ma le tuugaaau taitoatasi ma Swim individual and relay e amata mai Mulifanua e oo i Salelologa e kolosi ai le Apolima Strait.
O nei lava tapenaga uma o ni polokalame aogā tele mo le atinae o tagata tafafao mai fafo, ma atili ai ona unaia le tamaoaiga o Samoa.
