O le Aso Gafua, 07 Mati 2011 pe tusa o le itula e 5 i le afiafi i le Malae i Lotoso‘a le To‘aiga o Tumua, na aofia potopoto ai le Itumalo atoa e afua mai i Tufulele seia oo atu i Levi/Saleimoa, auā le paia i Aiga e Tolu, faapea le Fetalaiga ia Luatua ma le Gautaala.
Na auai foi le afioaga o Faleula, auā le Paia i Toetaufanua ma Alo o Malietoa ma le Faletolu, tainane Samoa na potopoto ae tauosi ai le “lagi” o le Afioga i le Maoputasi o Aiga, le Afioga a Nonumalo Leulumoega Sofara.
Na tuumalo le Afioga i le Ma‘oputasi ma falelauasi i lona aiga i Matavai le Lua‘ipou o Malo i Fasitoo-uta i le aso 17 Setema 2010. O le Afioga i le Ma‘oputasi sa ia umia foi le suafa Aiono, auā le Aiga Sa Tuala ma le mamalu i le Fale-a-Fasitoo, faapea le suafa Nanai auā le paia i le Aiga Tauaana, Galuefa ma Salogo.
Ae peitai, na te‘e le uluga i Aiga ma Luatua ina ua a‘e se finagalo i aiga, paolo ma gafa aemaise le nofo a alo, e taoto le Ma‘oputasi i lona aiga i Fasitoo-uta.
Na ta‘ua e se tasi o alo o le Ma‘oputasi, e faamaonia na solitu Aiga, faapea Luatua ma le Gautaala ina ua taoto le Ma‘oputasi i lona aiga i Fasitoo-uta, ma o le mafuaaga foi lea na lē faatinoina ai le lagi o le Ma‘oputasi i Saleimoa ina ua mae‘a le lagi o Aiono i Fasitoo-uta, ma le lagi o Nanai i Falelatai.
Na faailoa e le Susuga Aiono Aleni Sofara poo le Fetalaiga foi a Ape, e ui ina tee le finagalo o Aiga ma Luatua, ae na tali malu lava lo latou aiga, auā e talitonu i latou e iai lava le laolao ma le maninoa lelei e faatino ai aga masani ai, o le faafeagai o Paolo ma Gafa ma Aiga o le Ma‘oputasi, ma le paia o Aiga ma le Fetalaiga ia Luatua ma le Itumalo. Lea la na faatinoina i le Aso Gafua na mavae nei i le malae i Lotoso‘a.
Na matuā faatumulia le malae i Lotoso‘a auā foi na faatino lava le faa-Alataua ma logologopuialii fuaiala uma o le Itumalo e uiga i le Lagi o le Ma‘oputasi e pei ona tauosi ai i lea aso.
O le tofa ia Ape Aleni Sofara, na tu tootoo i lea aso tele e fai ma sui o Paolo ma Gafa aemaise o le Aiga Sa Nonumalo ma le Aiga Sa Noamaleniu.
Na logo faa-Tutuila le aofia ae faalele le faautautaga o‘o a le Tamaloa na Moemanatunatu. Na faamalulu le fetalaiga a Ape i le Itumalo ona o taimi ua tuanai ma le faitau eseese o finagalo i le taimi na tuumalo ai le Maoputasi.
Ae na logomālie lava ma talia e le Itumalo le faamamafa a Ape i lana lauga, e lē tāua poo fea e taoto ai lo latou Tamā, ae tāua le soifua tautua malo a Nonumalo i le nuu ma Ekalesia i Saleimoa, aemaise o le faaea Itumalo.
Na ta‘ua e le fetalaiga a Ape, e tuumalo le Ma‘oputasi o avea ma Aoao Fesoasoani o le EFKS i Saleimoa, a o avea foi Nonumalo ma matafale e tu ai le Ekalesia Katoliko i Lotoso‘a.
Maeu lea aso i le felanulanuai ma le laufofoga fiafia o le Aiga Sa Nonumalo ma le tamaoaiga na sasaa mo le Itumalo, ae maise o faaaloaloga mo Tapaau uma o le Itumalo sa auai, ae na matauina lava na faatili foe mo le a’e aua Luatua ma le Gautaala, le Ailaoa ma le Faletolu.
Maeu foi le matauina i lea aso o le maoa‘e o Ie o le Malo, aemaise le Ie o le Lagi ma le Ie o le Feagaiga na faapolopolo e aiga o Nonumalo ma na lafo ai le fetalaiga a Luatua atoa ai ma le faasopolia o faaaloaloga mo fuaiala uma o le Itumalo.
Na matauina i lea aso, e lei tagisā Luatua ma le Itumalo ia Ape na Malo Toga, ae na o le talitaoto lava o faaaloaloga maoa‘e o le lagi o le Ma‘oputasi.
O le tofa lava i le Tapunuu, le fetalaiga a Luatua na muai fetalai e tali le fetalaiga a Ape ma faailoa le agaga faagaeetia o le Itumalo ona o le aao malosi o le fetalaiga a Ape, faapea feoi ma gafa o le Nonumalo, aemaise le Aiga Sa Nonumalo ma Sa Noamaleniu, auā foi ua inu malie Tapaau o le Itumalo i faaaloaloga, faapea Luatua ma le faleupolu i le maau na sasaa i Lotoso‘a i lea aso.
Na fono faaopoopo le tofa a Fesala‘i i le agaga fainuu lelei o Ape ma le Aiga Sa Nonumalo, atoa ai ma le tausaafi o le Itumalo ia pa‘ū se Toa, ae tu mai se Toa.
Na ta‘ua e le tofa a Ape ina ua mae‘a le faamoemoe, pau lava lona agaga fiafia, ua mafai ona faatino lea faamoemoe tāua, ma ua malu lau tao ai lea tulaga sa tufala‘aia ona o eseesega o manatu e pei ona sa iai i le taimi na tuumalo ai le Ma‘oputasi, ma ua foi lo latou Aiga Sa Nonumalo e osiosi le faiganuu.
Na faaalia e Ape, na fausia e lo latou aiga lana tuualalo e faasee tuafaina mai le faiganuu ina ua solitu Aiga ma Luatua. O le laolao ma le maninoa lelei la lea, o lea ua masuiga mālie ma taoto i lago tonu mea uma.
