O le vaiaso talu ai na taunuu ai le alo iloga o Samoa i le Soka i lana kalapu fou i Saina o le Shanghai Shensua i le mae‘a ai o lana konekarate soka sa taalo ai i New York.
I se vaaiga maoae i le taimi na taunuu ai Tim i le malaevaalele i le faatumulia ma le sagisagi fiafia ane o le autapuai soka i lenei sui aupito logologoā o le Socceroo.
“O se feiloaiga e lē galo i lo‘u olaga atoa lenei feiloaiga ma tagata lagolago i la matou kalapu”, o se saunoaga lea a Tim Cahill i luga o le Twitter i lona taunuu i Saina. E lē galo i le atunuu tele lenei sikoa e lua mataina a lenei alo o Samoa ma la latou aufili i le taaloga o le kuata suega siamupini ma Ausetalia.
O le siamupini foi o Ausetalia i le Ipu lava nei a Asia ua atili sapaia ai e Saina Tim Cahill. Ae peitai i totonu lava o Ausetalia sa iai foi nisi na lotovale i lenei alo o Samoa e pei o le alii logologoā i leitio ma faasalalauga ia John Laws.
Sa faamuta e Cahill le la talanoaga ma Laws i luga o le leitio ina ua tuufesili soo le alii faasalalau ia Tim i lana tupe e maua i Saina ma faafoliga o le tupe o se mafuaaga leaga lea ua alu ai Cahill i Saina.
Sa faamatala auiliili e le alo o Samoa e lē o le tupe e unaia ai lana taalo mo Ausetalia ae foliga mai lava e agai pea fesili a Laws i le tupe a Tim i Saina.
I le molimau a nisi sa tau faailogalanu John Laws i lona talanoa e faapei o Cahill o se tagata e lē tatau na oo sana seleni i se maualuga faapea ma e foliga mai e tau talanoa maualalo i lenei toa o Samoa.
Na lagolago tele e le aufaalogo i lenei polokalame Tim Cahill ina ua ia tuu i lalo le telefoni ma faauma le talanoaga ma Laws sosoo atu ai ma le faitio tele o tagata e alolofa ia Cahill auā o la latou mau ua tatau ma sa‘o lele le faaiuga a lenei fetu pupula a le Socceroo auā ua loa lana tautua ia Ausetalia.
