Sa maua se avanoa faaauro e faatalanoa ai e le faatonu o le leitio a le Penina o Asuisui 1197am (Fiu Tamala Fiu) le Minisita o Tupe o si o tatou malo o Samoa, le Afioga Papalii Niko ma le faletua ia Doris Lee Hang e tusa ai ma le faigamalaga na afea ai Brisbane.
Sa logo faatutuila le faafofogaaga a le mamalu o Samoa i Brisbane e tusa ai ma le saunoaga manino a le alii Minisita o Tupe i le tāua o lea faigamalaga.
Na amataina le fonotaga i le Aso Lua ma le Aso Lulu o le vaiaso ua tuanai lea sa malaga mai ai sui o atunuu o le Pasefika e pei o Niu Sila, Fiti, Tonga ma isi atunuu laiti e aofia ai ma Samoa.
O le auga o aute ma le autū o le faigamalaga o le fonotaga faalemalo, sa tuufaatasia ai atunuu laiti o le Pasefika e talanoaina le tāua tele o le malosiaga o le eletise ae taumafai la i ni auala e tau pa‘ū mai ai le alualu pea i luga o le tau o le suauu a o iai i le taugata o le soifuaga i nei aso.
Sa talanoaina ai le tatau ona silasila toto‘a ma vaai ta‘ita‘i o le Pasefika i auala e foia ai lea tulaga ma ni auala e maua ai le malosiaga mai le lā ma le savili, peitai e fai lava si taugata tele o auala nei.
Na fai sailiiliga a atunuu eseese ia ma e mau eseese lava taofi ma le mea e ‘auga i ai Fiti, ese Tonga ese foi Samoa.
O le faatāuaina pea o le faaaogā tatau o le tulaga e faaitiitia ai le pili o le eletise e ala lea i le faaaogā o isi ituaiga matāuila e lē o le lapotopoto ae o le isi ituaiga matauila e pei ona silafia e sefe mai ai le eletise.
O nisi vaega e alu i le eletise e pei o masini tamea, pusa aisa ma isi, o loo taumafai le atunuu e tau faaitiitia tulaga lea ua gaosi i Samoa e pei o Niu Sila ma Ausetalia.
O loo fautuaina ai le au gaosi masini nei ina ia mautinoa ua iai le lable lea e iloa ai o loo fausia masini i se aotelega e mautinoa ai le lē soona alu o le eletise.
E pei foi la o le pa‘ū o le tau o le telefoni i le taimi nei, ua fai sina manaia tele ona o le faiga faatauvaga lea sa faia e le SamoaTel ma le isi kamupani telefoni o le Digicel.
Na ta‘ua foi e le afioga i le Minisita o Tupe le vai lea i Fagaloa e ui lava e lē tele se malosiaga o maua mai ai, peitai o loo manuia ai Samoa i le taimi nei.
O le uiga o lana saunoaga, ana faapea ua malie mai le afioaga o Sili e faamatuu mai lo latou vai ona o le tele o le suavai i lea alalafaga, semanu e faafaigofie ai se fesoasoani. I le aafiaga i le tau o suauu e mafua ai ona alu i luga le tau o vaalele, vaa, faapea taavale.
Na momoli le agaga faafetai o le alii minisita i tauaiga o loo aumau i atunuu i fafo ona o le alolofa atu i aiga i Samoa, e pei ona tele ai se fesoasoani tau seleni o auina atu pea i vaiaso uma.
Sa faamautu le faigamalaga i le faletalimalo i le taulaga o Brisbane, ae tuu asiasi atu e uo ma aiga e pei o le pule sili o le Uncle Sams Catering, Poulava Sam ma le faletua ia Lorna Matautia.
O le Aso Tofi, 1 Iulai 2010 na toe taliu atu le uto ma le faigamalaga a le afioga ile Minisita ia Papalii Niko Lee Hang ma le faletua ia Doris i Samoa e faaoo atu le iuga o le fono, e tatau pea ona faaauau ona faaaogā le malosiaga faaeletise o iai i le taimi nei mo le isi 30 tausaga.
Sa iai le manatu maualuga o sui o malo sa usuia le fonotaga i Brisbane e tau pa‘ū se auala e faaaogā ai le la, savili ma le ea, peitai e fai lava sina taugata.
