O le aso 1-3 Iuni sa faataunuuina ai le togalauapiga a le Ekalesia Penetekoso Full Gospel Manurewa. E lata i le 90 sui o le Ekalesia sa faatasia ai ma le sini autu “Ia fua atili mo le Alii.”
O le agaga tonu lea ia faamalosia ma faatumauina le agaga fiafia o tagata tapuai o le Atua a o galulue ai i lona finagalo Paia, e pei ona faaalia e Malagamalii Fosi Tolovae o ia o loo faauluulu i ai le tapenaina ma Polokalamane faatino o lenei Togalauapiga.
O le faletua ia Talosaga Puletiuatoa sa faasoa foi “O matua o faiaoga muamua” faatasi ai ma le sui mai le Counties Manukau Health Board, o i latou ia o loo lagolago malosi i polokalame mo le soifua maloloina i ekalesia ma faalapotopotoga (Lotumoui).
O le susuga i le faafeagaiga Rev. Albert Atoa sa taitaia sauniga faaiu i le Aso Sa, a o le susuga ia Pastor Tino Tioa sa taualugaina le upu folafola a le Atua.
Tele polokalame tāua sa faatino ai, e pei o pese ma siva faaleagaga faatasi ai foi ma le faamalositino ina ia ola maloloina i le tino ma le mafaufau ae silisili i la le agaga. Sa faamanatuina ai foi ma le atoaga o le 50 Iupeli o si o tatou atunuu pele o Samoa.
