Taunuu le valaau faauuina

E felanulanuai taleni a le Atua mo soo se tagata soifua, ae peitai o le finagalo o le Silisili Ese o se ti‘a e lē seua. O se molimau lea a susuga i Faifeau ia Pastor Tom Meredith faapea Pastor Vili Aufai o Sini. O le faauuina mai o nei auauna o le Talalelei ma faailoga tikeri maualuluga mai le Iunivesite o Sini i aoaoga faa-Tusi Paia (BA Theology).

O lenei laasaga fou o le a atili fesoasoani ai i le atinaeina o Ekalesia ua tofia ai i Sini nei. O le susuga Pastor Tom Meredith ma le faletua ia Carol o loo galulue nei i le Ekalesia a le One Community Church i Glendinning.

O le tausaga talu ai na faaulufale ai lo latou Maota Tapuai na faatupeina i le tusa ma le $600.00 Ausetalia. Ua vaaia foi le faatupulaia o sui auai atu e vivii ma tapuai i lenei Ekalesia olaola.

O le susuga ia Pastor Vili Aufai ma le faletua ia Josie o loo galulue nei i le Ekalesia a le Grace Point i le tuatusi o le 282 Hamilton Rd, Fairfield West.

O lenei lava aulotu na galulue faatasi mo le auina atu o meaalofa mo fanau mai aiga tauatiae i Samoa i lalo o le polokalame o le Good Samaritan Purse.

O se mapusaga foi mo soo se tasi mai soo se atunuu e fia lotu ma auina atu a latou fanau i le aoga Aso Sa. O se aulotu foi ua mautu lona malumalu, fale o le galuega faapea le faletaalo (play house) mo tamaiti.

O le susuga ia Pastor Tom Meredith ua loa ona galue i Samoa ma sa avea foi ma Pule o le Faleoloa o le Matagaluega o Faatoaga. O le faifeau ia Pastor Vili Aufai na galue mo le Telecom Samoa faatoa malaga mai ai i fafo i le 1990, ma sa aotauina uma i laua i le Kolisi o Avele e ui e eseese vaitau na faaiuaso ai.

I le aso tele o le faauuga na o laua lava tamalii o Samoa na ausia faailoga tikeri i lea sauniga. Na saunoa Pastor Vili Aufai, “O le viiga e momoli i le Silisili Ese auā ua ia faataunuuina ma le manuia ana fuafuaga e pei ona uluai musumusuina mai.”

Ua alo atu nei susuga i Faafeagaiga mo isi polokalame o totoe a la aulotu mo le ‘afa faaiu o le tausaga e aofia ai se malaga faamisionare i Initia i le masina o Tesema.

“E toasefulufā le matou aumalaga ma e lē gata o le a masii atu e tala‘i le talalelei ma fesoasoani i Initia, ae o le a faailoa atu ai ma isi itu o le olaga faasamoa e fesoasoani i Initia, e pei o le gaseseina o meaai, faiga o le umu ma isi vaega utiuti o maua lava i Initia,” o se saunoaga lea a Pastor Vili Aufai.