Taunuu le moemitiga ale atalii ile fia laei ile Tatau a Samoa

aiga-potopoto-o-le-fanau-ua-laeiina-le-tatau-a-samoa

Ose moemitiga ua leva ona taoto ile loto ole alii o Pinono Lafoga Faraimo i lona fia laeiina lea ole tatau a Samoa poo le pe‘a, ae sa faatuai lava ona tali le manaoga o lona loto ona ose tali a ona mātua, auā e fai vavale lava ona manaoga pe a leai se faamanuiaga a lona tamā ia Seaga Falaimo Lafoga.

E lei faigofie ile tamā ona fetuutuunai sona manatu e tusa ai ma le manaoga o lona atalii, ona e silasila le tamā e lei sauni lelei lona atalii e laeiina le laei ole atunuu.

Muamua e laititi, ma lona lua e vaavaai mamao le tamā ile tu ma le aganuu a Samoa e faatino ele matai poo le tama ua laeiina le pe‘a a Samoa ia iloa ona tautala ile gagana faamatai, ma ia iloa foi ona tautua.

Ile naunau tele ole loto ole atalii ia faataunuuina lona manao, na ia sailiili ai ma fesilisili ai i lona tamā ile faatinoina ole ola tautua ma le olaga faamatai, ma o nei vaega uma sa fai lea ma aoga ile tamā ma lona atalii ile a‘oa‘o ma faasino le ola tautua ma le olaga faamatai, o lou faleaoga muamua o lou aiga.

Ina ua mautinoa ele tamā ia Seaga Falaimo Lafoga ma le tina ia Faleupolu ua saunia lo la alo, na tali ai loa i lona atalii ua alagatatau loa ona e laei ile tatau a Samoa e pei ona e manao ai. E tasi le vaiaso na taoto ai le susuga ia Pinono Lafoga Falaimo ile tāina o lana tatau ae na soa i lona tuafafine ia Easter Lafoga.

Ole aoauli ole Aso Toonai na sama ai loa le malofie ale susuga ia Pinono Lafoga ma lona tuafafine ile maota o Saega Falaimo i Otara. Na auai uma auaiga e molimau le alofa ma le agalelei ole Atua ona o lea ua tau lau ole faamoemoe e pei ona alofaiva iai le matua o faiva ia Salea Muliagatele Kasala Sanele ma lona falelua.

Ole susuga lava ia Seaga Falaimo na ia saunia le sauniga lotu e faapaia ai le galuega ale matua o faiva ma lona falelua. Lea na ia toe faailoa ai i lana fanau, ole tatau ma le malu e tautua ai le lotu ma aiga, ile tulaga faamatai ma le paluina ole ‘ava ile aganuu a Samoa i totonu o aiga ma ekalesia.

Na mae‘a le lotu ona alo loa lea ole matua o faiva e faatino lana galuega e pei ona uu ai tino ole fanau lea ua laeiina le laei Samoa sosoo ai loa ma le laua sausaunoaga.

Ole tofa ia Sa‘u Lafoga sa fai ma sui ole aiga e momoli le agaga faafetai ile matua o faiva ma le falelua ole aiga e tusa ai ma le galuega fita sa gapatia ai ile tele o aso, o lea ua taunuu ma le manuia le faatamasoaliiga e pei ona galulue ai, ma ole viiga lava e foi ile Atua.