E iai fua o faatoaga a Samoa e le mafai ona faatau sa’o i maketi i fafo ona e le ausia aiaiga o tulafono tau fefaatauaiga a isi atunuu. Ole aoga lea ole nofoaga ua mae’a fausia ma tatala aloaia ale faalapotopotoga o tina faipisinisi a Samoa e ave iai ia fua o faatoaga e toe gaosia ai nisi oloa ona mafai lea ona faatau i fafo.
Ose fesoasoani ale Malo ua fausia ai lea fale gaosi oloa i Nuu ile nofoaga oloo faagaioia ai taumafaiga tau faatoaga a tina faipisinisi o Samoa le Samoa Women in Business Development Incorporated poo le WIBDI.
Na amatamea le faalapotopotoga ile gaosia ole suauu popo ole virgin oil ina ua manaomia mai ele kamupani ole Body Shop i Lonetona Peretania. Ua faaopoopo iai ma le gaosia ole suauu mai le fua ole laau ole fetau ma ole kamupani foi lea i Peretania oloo faatauina.
Na saunoa le afioga ile Palemia susuga Tuilaepa L Sailele Malielegaoi ile tatalaina ole nofoaga i Nuu mo le gaosia o oloa mai fua o faatoaga ma ia toe faamanatu nisi o tiute ma galuega taua a tina faipisinisi o Samoa ina ua amata faatu, lea na latou toe lalaga ai le Ie Samoa maoi ole iniini.
Na maua ai le avanoa ile polokalame lea e toe agai tina ole atunuu e faamaopopo le toe lalagaina ole Ie Samoa mao’i ae na lagolago iai le Malo ma faia ai loa le polokalame ole toe lalagaina ole Ie ole Malo poo le Ie Samoa ua faaigoa ai nei.
Ose taumafaiga taua tele na amataina ele faalapotopotoga e pei ona saunoa le Palemia ma o lea ua taunuu le isi o ana miti ole fausia ole nofoaga e toe gaosi ai nisi oloa mai fua o faatoaga ile faamoemoe lava e faatau i fafo. Ose faamoemoe lelei auā ole aufaifaatoaga e manuia ai ile taumafaiga.
Oloo gafa nei le faalapotopotoga o tina faipisinisi o Samoa ma le atinaeina o auala faanatura e toto ai laau tau faatoaga poo organic farming.
Ose faiga ua sili ona alumia ai fua o faatoaga e faaaogā ai auala faanatula i atunuu i fafo auā e le faaaogāina ai ni vailaau.
Faaalia e Tuilaepa ose isi lea sao lelei ole faalapotopotoga ile atinaeina o faatoaga faanatula aua e aoga foi mo le soifua maloloina o tagata i Samoa. Ua 26 tausaga talu ona faatuina le faalapotopotoga o tina faipisinisi o Samoa, ma ole faletua o Adi Tafunai ole Faatonu. Ole maualuga o taumafaiga ale faalapotopotoga na manaomia ai lo latou tomai e isi atunuu ole Pasefika ma ose isi lea laasaga taua ile faagaioia ole faalapotopotoga ma ua faafetaia ai ele Peresetene ma le sui Peresetene tina na faavaeina le faalapotopotoga i tausaga ua mavae.
