O le Aso Faraile ma le aso Toonai, 27 & 28 Me na faatautaia ai le Misiona a le Pacific 2 Nations i le malumalu a le AOG, Campbelltown. O lenei polokalame sa afua i se miti a le susuga ia Pastor Lui Ponifasio mai Aukilani Niu Sila, e feiloai ai ekalesia ma faasoa atili i le le toe faaolaolaina o le soifua faamisionare o tagata Pasefika, o le faaauauina o le galuega sa faia e tuaa ua faiilagi le tuligasi‘a sa asaina le galuega a le Atua e aofia ai misionare na tuua Samoa ma o latou aiga, ae folau atu i le vasalaolao o le Pasefika auā le faasafuaina o le Talalelei i atumotu o le Pasefika.
O le susuga ia Pastor Tom Meredith na amatalia lea faamoemoe i se tatalo ina ua uma faafiafiaga faaevagelia ma le faapasefika e feiloai ai ma le paia ma le mamalu na aofia. E toafā susuga i faifeau na atofa e laugaina le finagalo o le Atua i aso e lua, ma o le susuga i le Faifeau ia Pastor Lui Ponifasio na saunoa muamua.
O le toe faamanatuina o le talafaasolopito o le taunuu atu o Ioane Viliamu ma le tala lelei aemaise le afea ai foi o Toga ma Fiti i lea vaitau na lē gata o le ao ai o Samoa ma faataunuuina le valoaga a Nafanua ia Malietoa, “E tali i lagi lou malo”, ae na atili faatelevave ai loa ma siitia e Misionare Samoa i lea vaitau 1830-1839 galuega tala‘i atu i le vasalaolao o le Pasefika.
Saunoa le susuga ia Ps Lui Ponifasio, o le faavae lenei o le taulaga na asa mai e Faifeau Samoa o loo tumau pea ma o se luitau foi mo soo se talavou, ma i latou o iai le taleni ia faaaogā lenei togiola mai a mātua ma tuaa e sosoo ai pea le galuega mo le alii. O le saunoaga na sosoo ai o se Faifeau ua loa foi tausaga i le galuega ia Ps Suliasi Kurulo mai Fiti, ua tolusefulu tausaga i le galuega, “O Viiga ma le tatalo e faamausali ai le tala‘iga, ia faasoa atu pea le Finagalo o le Atua i soo se nofoaga e oo lava i Magaala.”
Na lauga Ps Kurulo o soo se tasi e feiloai atu i ai ia o latou faafofoga ma uai mai i le matagofie o le Atua ma lona Alofa, ia faasoa atu i lou tuaoi, o fale faigaluega faapea foi totonu o pisinisi ma taaloga.
O le Aso Toonai i le itula e iva i le taeao i le lua, na toe faaauau ma taualuga ai lenei mafutaga tele e le susuga Ps Kalafi Moala mai le motu o Toga i lana lauga, “E lē tāua poo fea le nofoaga o le a e alu e te tala‘i ai le tala lelei, ae e tāua tele le Upu o le Ola o loo e afio atu e faasoa ma tala‘i atu.”
Na faapupula i le faigata o le tuua o aiga, nuu ma atunuu, ae peitai o le Atua o le a toalua ma oe. O le lauga faaiu na nafa lea ma le Susuga Ps Paulus Wiratno mai Indonesia sa faapupulaina le sauni atu o le tagata valaauina mo le galuega ma ia saunia foi i le taimi e tofia ai e le Agaga Paia.
O le aotelega o le galuega, “E lē afaina le tele o ni faamanuiaga ia te Oe ae o le tele o lau Foai ma Ofo atu.”
Sa taualuga lenei mafutaga paia ina ua ta‘ape le fuamanusina ma suafa o Misionare Samoa sa tagatavaleina ma maliliu ai i atumotu sa malaga atu ai mo le tala‘i atu i ai o le Talalelei, o loo lagomau ai foi e fai ma maturo. Ae manatua pea lo latou soifua tautua i le atunuu.
E silia ma le 800 tagata eseese o le Pasefika sa lolofi ane e fia auai i lea sauniga. E eseese uma faifeau sa iai, mai le tele o atunuu eseese o le Pasefika, ae sa faatupeina foi e le aao foai o nei ekalesia lenei galuega faaolaola mo misionare.
O le mafutaga foi lea sa faatuina ai se isi Luitau mo ekalesia uma o le Pasefika e ta‘u o le P2N500. O le tausaga fou i le masina o Iulai ma Aukuso, ua faamoemoe e 500 misionare o le a malaga e tala‘i, e 70 aumalaga e faamoemoe e malaga mo atunuu e 50 o le lalolagi.
E iai le talitonuga o le komiti faafoe o le P2N, o vavega o le Atua o le a vaaia i totonu o soo se ekalesia e ave le faatāua i le Misiona a le Atua, ina ia fai nuu uma lava ma soo.
