Taunuu le Gaualofa i Aiga ile tai

Na faaali le tali malo lelei ole afioaga o Faleu Manono ina ua taunuu i lona gataifale le Vaa o Samoa le Gaualofa ile Aso Tofi ole Vaiaso talu ai. O le malaga a le Gaualofa ma lona auvaa na tuua le taulaga vaa i Matautu Apia ile tusa ole 8 ile taeao, ae taunuu i Manono ile tusa ole lua ile aoauli. I tala ole folauga puupuu, na lagi lelei le aso ma vaivai savili ae na maua lava au malolosi na faloina atu le vaa ma taunuu ai ile taimi faamoemoeina.

O le aumalaga e aofia ai se vaega ole polokalame mai le Iunivesite I Hawaii, o alii ma tamaitai ua latou filiflia le motu o Manono e faatino ai le latou a’oa’oga ma su’esu’ega i tu ma aganuu, ae ole soifuaga faa Samoa.

Ua faitau vaiaso talu ona taunuu le vaega lena i Manono peita’i na malaga ane i Upolu e ti’eti’e atu ile folauga ale Gaualofa i Manono. Ose tasi foi lea ole latou sootaga ma le Vaa o Samoa, o loo faatautaia folauga i tomai mai anamua, e saili ma tapasa i fetu, galu, ao ole lagi, manu felelei, masina ma le la, lo latou ala vaa.

I na ua taunuu, na tamua lava foi ile ava ole feiloaiga lea na alo iai le afioaga, ma le taumafataga o i’a, talo, palusami, ma niu suamalie ole motu.

O le aumalaga mai Hawaii, o loo talimalo ai Faleu, o loo ta’ita’ia e le alii pisikoa ia Lasei John. O Lasei ua silia ile 30 tausaga talu ona ia tuua Manono ae o loo avaga pea ona lagona ma mafaufauga ia Maonono. Na ia talanoa, ose tasi lea o auala e maua ai pea le sootaga ma lona nuu, ma fesoasoani ai foi mo aiga. E ala ile tali api o tamaiti ole polokalame, i aiga ma avatu iai seleni e fesoasonai mo latou.

O nisi aiga ua mafai ona o latou toe vaai i ata o matua o matua ua leva ona maliliu, ae ua toe fafagu mai o latou foliga i ata na tapu’e e le palagi, i tausaga ua mavae.

Manaoga o Manono

Ua amata ona mamalu ifo le afiafi, ae ole finagalo ole nuu, ua uma ona tapena maota mo le auvaa ma le tapuaiga a aiga na malaga atu.

O lesi manaoga ina ia latou fai taumafataga faaatasi ma le auvaa ile aso e sosoo ai, ile aoauli ma le afiafi. Lea na tali fuaitau le Susuga Mailagi Lauaki, e lagona le faatauvaa ona ole faatigaina ole afioaga, aua o lea lava sa malaga tapena atu le auvaa mo luga ole sami. Ae ole faaaloalo maualuga, ua talia ai ma le agaga faafetai.

Ole ta ole fitu ile afiafi na amata ai faiga siva o fiafia faapitoa a le autalavou a le ‘Ekalesia Metotisi. Tusa ole 40 o alii ma tamaitai ole autalavou na faaali foi lo latou fiafia e ala i faafiafiaga faa Samoa, o pese ma mauluulu, o siva, ae ole faatafiti ma le taualuga.

O le aso na sosoo ai Aso Faraile,  na faapitoa lava lea mo maimoaga ma le polokalame faaleaoaoga, e faasoa atu ai foliga ma le avanoa o luga ole Gaualofa i alo ma fanau mo a taeao o Faleu Maonono.

Na talanoa ai le tamaitai ole auvaa, ia Tujumosairo Faataga o Moataa, ose avanoa mo ia e mafuta ai ile tele ole auvaa, aua e faigaluega ile tele o aso, ae ole avanoa ua oo ai i Maonono, ma mafuta i tupulaga ole nuu.

Ae ole faafetai tele a le tamaitai Kapeteni, Fealofani Bruun ile talimalo lelei a le afioaga o Faleu Manono ma le avanoa ua faatino ai lenei sootaga taua mo nei tupulaga o aso nei ma le lumana’i.