Taunuu le BlueSky Samoa i laufanua o Niu Sila

Ua faalauiloa le avea o le BlueSky ma paaga faapisinisi a le Spark mo auaunaga telefoni feaveai totogi muamua i totonu o Niu Sila. O le oo mai o le BlueSky,  e tauala i auaunaga talafeagai mo le mamalu o le atunuu o loo alala ma papaaao i Aoteroa nei.

O le BlueSky ua avea nei ma taimua i totonu o le Pasefika i le faatinoina o fesootaiga e tauala i le telefoni feaveai, initaneti, televise, ma telefoni fale i totonu o Amerika Samoa, Samoa ma le Atu Kuki.

Ua faamanino mai e le Afioga a le Alii Pule, Toleafoa Douglas Creveey, “O le sini autu o le faamoemoe o le BlueSky, ina ia maua gofie ma taugofie ona fesootai o tatou tagata i le Pasefika.” Ua faatupulaia le auaunaga a le BlueSky, o le naunautaiga ia avea ma Kamupani e te filifilia muamua mo tagata Pasefika i le lalolagi atoa.

O lea sa taumafai ai le BlueSky e saili se avanoa e mafai ai ona faataunuuina ia fesootaiga a tagata Samoa i totonu o Niu Sila.

Ua loa ona sailia e le BlueSky ni auala e faamalieina ai manaoga tau fesootaiga a tagata Samoa i Niu Sila.

Mai ni sailiiliga o tagata Samoa i Niu Sila ua tuufaatasia ai e le BlueSky ni auaunaga talafeagai lelei mo le faaaogāina o le telefoni feaveai i totonu o Niu Sila ma le valaau atu i Samoa.

O a matou auaunaga uma e totogi muamua, ae e ia te oe le aiātatau e te filifili ai e faatau lau paleni i luga o le upega tafailagi (website) a le BlueSky atoa ai ma faleoloa.

Ua faataoto nei e le BlueSky  le alafua e mafai ai ona faipaaga ma Ekalesia ma Tapuaiga Samoa i totonu o Niu Sila e fesoasoani ai ia latou atinae ma polokalame faataatitia ma faatino e ala i autalavou, aoga Aso Sa i totonu o aulotu taitasi.

Faamatalaina e Toleafoa Tiafau Douglas Creveey  (Alii Pule o le BlueSky Niu Sila),  Ua faamautuina mai i ia suesuega le lagolagosua o tagata Samoa i le Kamupani BlueSky i Niu Sila nei.

Ua maitauina le toatele o le mamalu o le atunuu o loo fesootai atu i o latou aiga ma uo i Samoa i totonu o masina taitasi, e manaomia ai se auaunaga e faigofie ma taugofie e vili ai Samoa.  O le avea ai o le Spark e galulue soosoo tau‘au ma le BlueSky ua mafai ai e paaga a le BlueSky ona latou faaaogāina le auaunaga lautele i totonu o Niu Sila.

E tusa ai ma le 97% o nofoaga faigaluega, maota ma laoa, ma laufanua o Niu Sila, o loo alala ma papaaao ai o tatou tagata ua mafai ona maua ai lea auaunaga.

O le avea o oe o se tasi o le auaiga a le BlueSky i Niu Sila, e ao ona iai lau BlueSky SIM Card.

Talaaga o le BlueSky

O le BlueSky ua taimua nei i totonu o le Pasefika i le faatinoina o fesootaiga e tau ala i le telefoni feaveai, initaneti, televise, ma telefoni fale i totonu o Amerika Samoa, Samoa ma le Atu Kuki.

Ia Iulai 10, 1999, sa tatalaina ai le BlueSky i Amerika Samoa ma avea o se Kamupani telefoni feaveai, initaneti, ma le televise.

I le tausaga 2009, sa tatala aloaia ai le Submarine Fiber cable mai Hawaii i Amerika Samoa ma Samoa.

Ia Mati 2001, sa faatauina ai e le BlueSky Amerika Samoa le 75% o le SamoaTel.

Ia Fepuari 2015, sa faatauina ai e le BlueSky le 60% o le Kamupani Telefoni a le Atu Kuki (Telecom Rarotonga) mai le Spark a Niu Sila.

Ua avea nei le BlueSky Holdings i Niu Sila o se tasi o lala o le BlueSky Pacific Group. O le autu o le faamoemoe a le BlueSky ina ia ausia auaunaga sili atu faatekenolosi e mafai ona fesootai ai tagata ma pisinisi i auala fou faatekenolosi, e faaititiia ai tau ma faaaupegaina ai tagata faigaluega, auā le manuia lautele ma le tamaoaiga o pisinisi.

O se tasi o manulauti o le BlueSky, o le fesoasoani malosi i le atinaeina o tagatānuu ma soo se atunuu o loo iai le auaunaga a le BlueSky, aemaise le lagolago malosi i le faagatama o le lakapi i totonu o le Pasefika.

E talitonu le BlueSky o le manuia lautele o lana auaunaga e faalagolago i le umia saoloto e tagata o faamanuiaga tau seleni. O le 46% o le Kamupani BlueSky Samoa o loo umia saoloto e tagatānuu o Samoa.

O ni taui ma ni tupe maua e toe foi lava i le mamalu o tagata Samoa, e faapena foi le faatinoga o loo faagaioi ai le Kamupani BlueSky i le Atu Kuki.  O loo agavaa ai tagata faigaluega ma le pulega ma ni sui e maua taui ma faamanuiaga e ala i tupe faasili.

Na saunoa le tamaitai Pule Sili – Lindsay Cowley (GM Product Wholesale & International), e faailoa le lagolagoina malosi e le Kamupani Spark, o le ulufale mai ma avea le BlueSky ma ana paaga, aemaise le naunautaiga o le Spark ia faasoa atu ana auaunaga e ala i telefoni feaveai i le Atu Pasefika.

Afioga Faolotoi Fatialofa Reupena Pogi Aoe’e Adolfo Montenegro. Toleafoa Tiafau Douglas Creevey (Managing Director)