Ole pole ua tauaao ele Palemia ole faailoga ole taunuu i fanua ole laina o fesootaiga ua taoto mai lalo ole sami

Ole pole ua tauaao ele Palemia ole faailoga ole taunuu i fanua ole laina o fesootaiga ua taoto mai lalo ole sami

Ole faai’uga ole masina lenei o Novema ua faamoemoe e tatau ona maea uma ai tapenaga ole taunuu mai ole laina o fesootaiga ua faataoto i lalo ole sami le Tui Samoa submarine cable. Ua taunuu le laina o fesootaiga i Upolu e pei ona iai le sauniga sa faia i gataifale ole afioaga o Moataa ile amataga ole vaiaso ua mavae, ae oloo faatali le aso e taunuu ane ai le isi vaega ole laina i Tuasivi i Savaii.

Ole saunoaga ale Palemia ina ua taunuu le laina i Upolu ole a saoasaoa fesootaiga televavave ma ole a taugofie. Ose fesootaiga foi ua faaalia ele taitai ole Malo e tatau ona maua uma ai e tagata ni fesootaiga sili ona lelei ma vave e le gata mo galuega eseese, o pisinisi, ae ole a maua ai loa ma fesootaiga faaonapo nei mo le auaunaga tau soifua maloloina faapea ma aoaoga. Ole tea ole iva ole taeao ole Aso Gafua 30 o Oketopa 2017 na faatumulia ai gataifale o Moataa ile au valaaulia ma sui ole kamupani ole Tui Samoa cable ile faafeiloai ole laina o fesootaiga lea na toso mai e se vaa tele ole sami sa taula i gatai o Moataa ma toso mai ai i uta le laina poo le uaea o fesootaiga.

Ole taitai ole Malo ma le minisita o fesootaiga faatasi ai ma sui o kamupani ua faisea ile kamupani ole Tui Samoa na latou tosoina mai ile pa’u matu le laina ina ua maea ona tauaao ele afioga ile Palemia le pole ole sami na aumaia le laina i uta ile pa’u matu.

Faaalia ele Pulenuu ole afioaga o Moataa ole a lagolago le afioaga i soo se itu ile atinae ale Malo ma ole a faapea foi ona tuu atoa le malosi ole nuu e lagolago ai ile vaaia lelei o meatotino ale Malo ua i totonu o ona eleele. Ole nofoaga ua faamautu iai le laina o fesootaiga ua fausia i totonu ole lotoa ale Kolisi o Samoa ile vaega ole fanua ole Malo oloo ile tulimanu ole pa ile afega ile alatele e agai ai i Vaivase uta sosoo ma le Malumalu ole EFKS i Vaivase tai. Ole a oo atu le laina ole Tui Samoa cable i isi atunuu ole Pasefika e pei o Fiti, le atu Kuki, faapea Uea ma Futuna oni teritori ole Malo o Farani.

Ole afioga ile Palemia susuga Tuilaepa L Sailele Malielegaoi ma le Minisita o Fesootaiga afioga Afamasaga Rico Tupai ma sui ole au faisea ole kamupani ole Tui Samoa submarine cable a’o latou tosina mai ile pa’u matu i gataifale ole afioaga o Moataa le laina o fesootaiga ua faataoto i lalo ole sami

Ole afioga ile Palemia susuga Tuilaepa L Sailele Malielegaoi ma le Minisita o Fesootaiga afioga Afamasaga Rico Tupai ma sui ole au faisea ole kamupani ole Tui Samoa submarine cable a’o latou tosina mai ile pa’u matu i gataifale ole afioaga o Moataa le laina o fesootaiga ua faataoto i lalo ole sami

Comments

comments