O le Aso Tofi ua tea nei na talanoa ai le alii fusu mai Ausetalia ma le Samoa Times i Apia. Na malaga atu o ia i Samoa e faatasi i faaaloaloga a le Malo ma le S.A.S.N.O.C. na fai mo le ‘au a Samoa na faatasi atu i le Commonwealth Games i le Gold Coast. E lima pine a Samoa na maua ai, e lua auro ma siliva e tolu. E na’o le pine siliva a Ato e ese mai i Pine e fa a le Au Siisii uamea mamafa na maua.

Na ta’ua e Ato le faigata o fusuaga e fa na feagai ma ia. E lua fusuaga amata na manumalo ai Ian Darby o Jamaica ma Ali Khan o Pakisitani. O isi fusuaga e lua o fusuaga Pine ia na manumalo ai ia Harley O’Reilly o Canada ae faia’ina ia Sammy Lee o Wales i le fusuaga autu mo le pine auro. Ae fai mai a ia, o le fusuaga na pito sili ona faigata o le fusuaga ma Khan auā e malolosi tele tu’i le alii Pakisitani. Na faalogoina e ia e pei na tau malepe lona tino i le mamafa o lima o Khan.

E ui i lea na taumafai lava ina ia maua e ia le Pine auro i le fusuaga mulimuli peitai e lei manuia lana taumafaiga. Ae ua mitamita le alii fusu i lana pine siliva, e pei ona ia faaali mai i le sui ole Samoa Times lana pine na maua.

E ui ua pale o ia i le pine siliva i le Commonwealth Games, ae o loo iai lona naunautaiga ia ausia e ia le Olimipeka i Iapani i le 2020. E ui e muamua le Pacific Games i le tausaga fou 2019 ae o lona naunautaiga ia maua sona avanoa e fusu ai i le Olimipeka.

Na toeitiiti lava lē mafai ona fusu o ia mo Samoa, auāa na muamua piki o ia e Ausetalia. Ae peitai ona o tulaga faigata ma faaletonu na fai e Australian Boxing ia te ia ua sui ai loa ma le atunuu e fusu ai. Aua e tolu atunuu e mafai ona fusu ai Ato, o le atunuu na fanau ai o Ausetalia, poo le atunuu o lona tina i Polani poo le atunuu a lona tamā i Samoa.

Le alii fusu o Ato Plodzicki

Le alii fusu o Ato Plodzicki

O le tausaga na tea nei na filifilia ai loa o ia e fusu mo Samoa i taaloga a le Commonwealth Youth Games i Nassau, Bahamas. Mai lea taimi ua masani ona malaga atu ai o ia i Samoa ma amata ai ona masani i tu ma aga o Samoa. Na ta’ua e Ato e fiafia tele o ia i le olaga faa-Samoa, e ui e lē mafai e ia ona tautala i le gagana ae ua fiafia tele o ia e fusu mo le atunuu o lona tamā.

O lona tamā o le tamalii Samoa o Steven Faoagali mai Siumu ma Tuanai. Fai mai Ato e tāua tele ia te ia itu uma e lua, o lona tina o Monica faapea foi ma lona tamā. E fiafia tele o ia i taumafa faa-Polani ae ua masani foi i taumafa faa-Samoa.

Ae o lona olaga fusu o lona tamā o Steven na faasino ala ia te ia. O le fautuaga foi lea a ona mātua ia toaga e toleni lelei ona mulimuli ai lea o manuia ia te ia. E talitonu o ia i lea fautuaga auā o taimi uma e fai ai sana fusuaga e alu atu o ia i totonu o le maea e lē o popole i se mea auā ua mae’a le mamafa o ana toleniga e tapena ai mo fusuaga.

O le eseesega lea o le fusu ma le lakapi na taalo ai o ia a’o laititi. O le lave o le lakapi e te faalagolago i isi tagata o le ‘au. Tusa la pe 100% au tapenaga ae a faaletonu tapenaga a isi tagata o le aulakapi e faaletonu ai ma ana taumafaiga.

Ae o le fusu i totonu o le maea e talia atoatoa e ia lea taaloga auā e na’o ia lava e faalagolago iai. E lē popole la o ia i taimi o fusuaga auā e 100% i taimi uma ana tapenaga i fusuaga uma e feagai ma ia.

Comments

comments