Taunuu Amapasa o Netherlands, Pakistan ma Portugal

Ua mae‘a ona tauaaoina Tusi Taualoa a Amapasa o le Malo o Netherlands, Portugal faatasi ai ma le Hai Komesina o le Malo o Pakistan i Lana Afioga i le Ao Mamalu o le Malo, Afioga Tui Atua Tupua Tamasese Efi. O lenei sauniga na faatinoina i lona maota i Tuaefu. O Robert Willem Zaagman o le Amapasa o Netherlands, o Zehra Akbari o le Hai Komesina o Pakistan ma Paul Cunha Alves o le Amapasa o Portugal.

O le aso 29 o Novema 2014 i le aoauli lea na taunuu mai ai le Amapasa o Netherlands, o le aso 02 o Tesema lea foi na taunuu mai ai le Amapasa o le Malo o Portugal ma le aso 03 lava o Tesema na toai taunuu mai ai foi le Hai Komesina o Pakistan.

I le feiloaiga na malele ai Lana Afioga i le Ao Mamalu o le Malo e faafeiloai ma faailoa nisi o mataupu o loo galulue faatasi ai malo e tau ala atu i lalo o le faamalu a Malo Aufaatasi auā lona puipuia mo le lumanai manuia o tagatānuu o soo se atunuu.

O le feagaiga faavaomalo i le va o Samoa ma le malo o Pakistan na amatalia lea ia Mati i le tausaga 1983, ae o le va o Netherlands ma Samoa na amatalia lea i le tausaga 2016.

Peitai o ni atunuu e pei foi o Samoa, saunoa lana Afioga i le Ao Mamalu e faapea, o loo tulimatai pea mataupu e aofia ai le siosiomaga lautele o suiga o le tau, o le faatumauina lea o le unaia o le puipuiga lelei o ‘oa faalenatura aemaise o tulaga tau i puipuiga ma le saogalemu faapea foi ma mataupu tau i tagata tafafao maimoa mai fafo. Na malele faafetai ai le Afioga i le Ao Mamalu o le Malo, i Taitai o Malo e tolu ona o le latou fesoasoani e tau ala mai i le Iuni a Tagata Europa auā le faatupeina o Atinae. Na faaalia foi e le Ao Mamalu o le malo o Samoa e faapea, o loo taulai pea le vaai a le Malo o Samoa auā le faaauau pea o le galuega faapaaga o nei Malo ma Samoa.

Sa taualuga le Saunoaga a lana Afioga i lana Malelega e faapea, o loo maumaututu pea lona talitonuga, o le tulai mai o Sui o Malo e tolu e avea ma Amapasa fou i le Malo o Samoa, o le a galulue vavalalata ai nei Malo ma Samoa auā le faatinoina o Atinae, aemaise le puipuia lelei o ona laufanua ina ia maua e tagatānuu uma sootaga ma faiga paaga aemaise o le tulimataia o manuia lautele mo soo se tagata soifua.

Source
Se tasi o amapasa ma lona faletua, ma le Afioga i le Ao Mamalu o le Malo ma lana Masiofo