“Ua fai si leva o matou nonofo ma si toeina.” Ile faamatalaga ale tamā ia Si‘alei o Faleatiu, ole afafine ole toeaina ua maliu e nonofo ma lona atalii.
Ae ile uma ane ole faatalanoaga male tusitala, sa ia taumate le suafa o le toeaina, e oo lava i lona atalii oloo nonofo male afafine ole toeaina sa ia taumateina foi le nuu o Savaii e sau ai le tamā o lona toalua. Peitai na ia ioeina o Faga ina ua ta‘u atu le igoa o Faga.
Ua faamaonia mai i Siufaga Savaii, na teu atu i Savaii le tamā ia Semisi. E oo mai ile taimi o tatou sailiga e lē o iloa lava poo ai na ia faaoo manu‘aga tuga ile ulu e pei ona molimauina ile tino ole toeaina na afua ai le maliu. E oo lava ile tala mai leoleo, oloo faia pea foi a latou suesuega.
Peitai ile molimau ale tamā ia Si‘alei, masalo ose tagata malovale ua oti ai si toeaina. “O matou e tuaoi ma Satapuala, tuaoi male Esetete, o tua iina na tupu ai.”
Ole toeaina e nofo i Savaii, ae ole tausaga lenei na sau ai si toeaina, ile faamatalaga a Si‘alei, pau le mea ua iloa e leoleo ua tuu atu ile ofisa o leoleo e latou te suesueina.
Na oso faalava mai le alo teine o Si‘alei ma lana foi lagolago ile faamatalaga a lona tamā, “e mamao lava i tua le mea na tupu ai, ae matou te lei iai ile taimi na tupu ai le faalavelave.”
“Ua leva ona nofo ia matou, pe tausaga pe lua foi, sa nofo ile isi fale”. Na toe tatao mai e Si‘alei, “o matou e tuaoi ma Satapuala male Westec, o tuā iina ile mea lena,
Na talosaga le tatou suesuega ile atalii o Si‘alei lea e nonofo male afafine ole tamā ua maliu, ia Semisi, mose faatalanoaga ma lona toalua i sona lagona.
Peitai lana tali, “ua uma ona fai tala. Ae o ita e leai se tala tele, o ita sa ma‘i ae pe ua lua tausaga talu ona matou mafuta male toeaina.”
Ae o lona afafine matua lava lea e nonofo male atalii o Si‘alei.
O lana tali, ‘E lē o mafai ona toe manao e talanoa ona e toe oo ai lagona tiga ile mea na tupu.’
Faatali pea Si‘alei ise tala a leoleo ile maliu o lona ia foi atalii
“E oo mai nei e lei oo mai lava se tala a leoleo, pe matou te talanoa foi ile maliu o lo‘u atalii.” Ole alo tama lea o Si‘alei na lavea ile pulufana ile taeao ole osofaiga a leoleo ole 2012 i maota o lea aiga i Faleatiu.
Na molimauina ai le atiati solo o pulufana i piliki o fale ole aiga, o pou paipa ma apa o ato ai fale ole aiga na iloga ona atiati ai pulufana.
Ole osofaiga lava lena na aafia ai se tasi o atalii o Si‘alei ma maliu ai lava. Na umi se taimi o faatalitali le aiga ise faaiuga o suesuega a leoleo, poo ai e ana le pulufana na maliu ai.
Peitai ole tali a leoleo i taimi o sailiga faapea, o le faaiuga o suesuega mai Niu Sila ua maua mai, ae oloo taofia ele Komesina o leoleo o lena vaitau. O lea ua fā tausaga mulimuli ane, oloo faatali lava lea aiga ise tala a leoleo. Ae ole maliu ai o tama ia Semisi, na saunoa Si‘alei, masalo ose tagata malovale na oti ai si toeaina. Oloo faia pea sailiga a leoleo faapea foi ile tusitala.
