O tausaga taitasi uma ile faai’ui’u ai ole tau mafanafana, e faia ai ile aai o Melepone le faafiafiaga (festival), e faaigoaina ole Moomba ole upu ile gagana Apoliki, ae ole summer festival pito i telē lea ia Ausetalia atoa.
E vaiaso atoa e faasavali ai polokalame ole Moomba, ole tele o polokalame e agavaa mo aiga mai fanauiti e oo lava i tagata matutua.
E tele lava foi ina faia ai faafiafiaga a atumotu ole Pasefika, ma gasese ai foi taumafa e faailoa atu ai foi a tatou tu ma agaifanua, o faafiafiaga uma ma fuafuaga e faia uma i luga ole auvai ole vaitafe ole Yarra River lea e faalava ile ogatotonu ole taulaga tele o Melepone.
O tausaga uma e amata ile savali tele a atunuu eseese ma faalapotopotoga ile taeao ole Aso Gafua lea e faailoga tonu ai le Labour Day, a’o le afiafi la ole Aso Toonai ole vaiaso lava lea, e valaaulia ai e le Palemia faasetete sui o atunuu taitasi o nopia’i ma nonofo i Vitoria, ina ia talisua faatasi ma ia ma lona faletua aemaise o faauluuluga o matagaluega eseese ole faigamalo.
Ose avanoa lelei foi lea e feiloai ai sui o atunuu ma le malo auā ni mataupu o fia soalaupule ma malamalama iai, ae ose taimi talafeagai ma tāua tele foi lea e faamasani ai ile faigamalo aemaise o sui o isi atunuu.
Ole Aso Toonai la na tuanai atu lea na faataunuu ai le talisuaga lea ale palemia faasetete a Vitoria, sa faatumulia ai le Exibition Centre i tagatānuu eseese pe ā ma le tolu ile fā afe tagata e tali le valaau faaaloalo mai lana afioga le ta’ita’i ole faigamalo faasetete o Vitoria le susuga ia Daniel Andrew.
Na lasi le silasila ma le vaai ile felanulanua’i o teuga ma laei o atunuu eseese e pei foi ona maitau ma le mimita le filo ai o puletasi lalelei ma sei matagofie o tina Samoa, ae salani e laei alo’a ma iefaitaga o tamalii ma failauga ma a latou ula fala na lē toe tauilo ai le sega ale Tui Manu’a.
