Ese mai taumafaiga o loo faia nei a le Matagaluega o le soifua maloloina i le atunuu i le taumafai lea e foia ma taofiofia le pepesi a le faamai o le swine flu mai le atunuu, e iai foi se tasi o a latou matafaioi tele o loo feagai nei ma latou i le taumafaiga lea e taofia ma aveesea le gasegase o le fiva rumatika. I faamaumauga lata mai o lenei gasegase e tusa ma le 150 soifua e maumau ai i le tausaga i totonu lava ia o Niu Sila e ui e seasea maua i nisi o atunuu.
O auga o lenei gasegase e aofia ai le tiga i le faai (tulou) ma e taatele i nofoaga e tumutumu ai tagata. O le vaiaso nei sa feiloai ai le tamaitai polofesa o le soifua maloloina i le Iunivesite o Aukilani, Diana Lennon ma le au fomai faapitoa e iloilo lenei gasegase ma ona aafiaga ma ia taumafai e aveesea. O le tausaga e 2002 na amata aafia ai tagata i Niu Sila nei ma o se tasi o itu na faasinomia e lea tamaitai o le tulaga vaivai o le itu tau i le soifua maloloina mo le tamaitiiti Maoli ma le Pasefika lea e sili ona lamatia soifua i gasegase faapea. Faaalia foi e le tamaitai polofesa e tatau lava ona iai se avanoa o tamaiti i tulaga tau soifua maloloina i totonu o aoga. O se tasi lea o mataupu e ao ona talanoaina e le malo ina ia laugatasia aoga e faataunuu ai lenei fuafuaga i se faatupega e mafai ona faaagaga i ai mo le soifua maloloina o le fanau.
O le fiva rumatika e talitonuina e ono aafia ai le fatu, sooga o tino, faiai faapea ma le pa‘u atoa ai ma le isi ituaiga rumatika (acute) e masani ona aafia ai tamaiti mai le lima tausaga i le 15 tausaga le matutua. O nisi o togafitiga o loo taua mo i latou e aafia ai e aofia ai le faatele ona malolo, inumia o fualaau tui, penicillin, fualaau o mea tiga, atoa ai ma le tuuina i le falemai pe afai e tigaina tele. O fautuaga masani mai le Matagaluega o le Soifua Maloloina ina ia faaeteete ma mataitu lelei lea foi faamai aua ua iai soifua ua maumau ai.
