O lea na maua se lipoti e faapea, na feau e le alii Palemia le susuga Tuilaepa Lupesoliai Sailele Malielegaoi se feiloaiga ma le alii tusitala, le faatonu o le nusipepa a le malo le Savali i le vaiaso na tea nei, ina ua oo atu se tusi faaseā mai i le aiga o le tusitala faaolioli lea na ave se tagi ua faamalolo ai nei mo se vaitaimi le alii Faatonu mai i lana galuega.
O se tusi na avatu i le Tamā o lea tamaitai, ua logo ai le Taitai o le Malo ma le Loia Sili le afioga Aumua Ming Leung Wai, i le faaaogā o o la suafa e le aiga ma uo a le alii Faatonu ia Tupuola Terry Tavita e faasufi ai le ave i tua o le tagi ua faia faasaga i lea alii.
Faaalia i lea tusi e faafā (4) ona oo atu aiga ma uo a Tupuola Terry Tavita i le aiga o lenei tamaitai ma talosaga le toe tatala i tua o le tagi o le taumafai e faamalosi lea tamaitai.
O le tala ua alu atu ai o le fautuaga poo le faaatonuga lea ua avane e le Alii Palemia a o le alii Loia Sili foi.Faaalia e le Tamā o lea tamaitai ua tatau ona lapataia le alii Faatonu e tuu lana amio lea ua fai. O le faamatalaga a le Komesina Lagolago o Leoleo ina ua tapa mo sana faamalamalamaga o lenei mataupu.
O tuutuuga o le tatala i tua o Tupuola Terry mai i le taofiga e leoleo i aso malolo, o le tapu lea ona taumafai e fesoota i le tamaitai ua faia le tagi faasaga ia te ia. O lea la ua talia le tulai i luma o le faamasinoga o Tupuola i lenei vaiaso mo se tali i lenei moliaga ae o le a faapea foi ona mulimulitai pe toe faamalosia le faatonuga e pei ona agiga mai i le Sui Komesina o Leoleo e aveese ai lenei alii mai i le taumafai e fesootai le tamaitai ua faia le tagi faasaga ia te ia poo lona aiga foi.
O le tuutuuga o le faamalolo ai o TupuolaTerry Tavita mai i lana galuega o loo maua lava lona totogi ma e faatoa iloa foi le tulaga e oo i ai lana galuega i le mae‘a ai o lenei mataupu i luma o le faamasinoga.
