Taumafai e fasioti le uo teine, 11 tausaga ile toese

Na oo le taumafai o Auvale Taumata Bragovits o Faleula i aoga maualuluga ma Iunivesite i Niu Sila, ma sa lelei foi lana galuega ina ua iu ana aoaoga. Na faaipoipo ai lava i Niu Sila ma maua le fanau e toaiva.

Ole tausaga e 2001 na foi mai ai i Samoa ona ole fia avea ma faifeau lea na sue ma au ile Kolisi Faafaife’au ale ekalesia Metotisi i Piula. Peitai ole tausaga e 2003 na faasala ai ma muta lona taumafai i Piula ona ole avamalosi.

Na foi i lona aiga i Faleula ma faia ai nisi galuega seia oo ina aafia ile solia ole tulafono. O ia solitulafono sa molia muamua ai, na sosoo mase isi solitulafono na tupu ia Oketopa ole tausaga e 2015, ina ua ia taumafai e faaoo le maliu ile tina o Maria sa fai se la faigauo.

Ole Aso Faraile ua mavae na aumai ai le faaiuga ale Faamasinoga Maualuga ile moliaga e tasi ole taumafai e faaoo le maliu, male moliaga e tasi ole umia ose a‘upega matautia sa ioeina e Auvale.

Ole afioga ile tamaitai faamasino, Mata Keli Tuatagaloa na seei ile mataupu lenei, ma sa ia matuā teena le finauga faaiu ale loia a Auvale Taumata le susuga Pa‘u Mulitalo, ona ose vaega o lea finauga tusitusia poo le submission sa faaalia ai ele alii loia, e lē tatau ona tuua‘ia na‘o lē ua molia, ona e iai foi le pitolaau ale tamaitai na aafia e fesootai male faia e Auvale ole solitulafono.

Le susuga Auvale Taumata Bragovits ile ogatotonu ma lona laei lanumoana ma lana matatioata, na ia umia se agaese ma faaoo ai ni manu‘a ogaoga ma tuga i lana uo teine le tina o Maria o Faleula
Le susuga Auvale Taumata Bragovits ile ogatotonu ma lona laei lanumoana ma lana matatioata, na ia umia se agaese ma faaoo ai ni manu‘a ogaoga ma tuga i lana uo teine le tina o Maria o Faleula

Faaalia ele tamaitai faamasino, ose finauga ua aliali ai ole alii loia ma lē ua molia e leai se faatāua ole silasila ile aafiaga ole tamaitai na faia iai le solitulafono aemaise ole gaioiga na faia e lē ua molia i lona faaoo oni manu‘a ise agaese (sapelu) a‘o pupula mata ole tamatama 14 tausaga a lē na aafia ua iloa ai e lē o tāua lea tulaga ile silasila ale alii loia.

Ole tolaulauga a leoleo na faaalia ai, ole vaveao ole aso 22 o Oketopa ole tausaga ua mavae 2015, poo le lima ile vaveao na agai ai le tina o Maria 41 tausaga le matua ma lana tama e 14 tausaga ma sona tei ile lotu taeao ole misasa ale ekalesia Katoliko i Faleula.

E savavali atu i latou agai ile falesa e leai se silafia oloo lafi lē ua molia ise pa maa e latalata ile faitotoa e ulufale ai ile lotoā ole malumalu. Ina ua latalata atu le savaliga ile faitotoa ole lotoā ole a afe i totonu ae vaaia loa le savali ane o Auvale oloo ofuina sona ofu paauli e pulou atu foi lona ulu, sa tau lē iloa ai ona foliga. Na vaaia e Maria ua latalata atu ma ia iloa ai ole alii lea ua musu ai e lē toe fia faaauau le la faigauo oloo ia uuina atu se agaese. Na valaau ane Auvale e faatali atu ae sa savali televave le tina peitai na vave le alu atu a lē ua molia ma ia sasau loa se ta i lana sapelu ma maua ai le tau‘au taumatau o Maria.

Na toe sasau atu le isi ta ma maua ai lona patua, male isi ta na maua ai se isi vaega o lona tino ma palasi ai loa i lalo ua matapogia. Na lagona ele tina o Maria le valaau ane osi ana tamatama “faamolemole aua le fasiotia lo‘u tina”. Ina ua mae‘a le gaioiga a Auvale na ia alu ile fale o sona tausoga ma tuu ai le agaese na ia faaaogā, ma faailoa i lona aiga le mea ua tupu ma ia fai iai e vili leoleo. O leoleo ile ofisa i Afega na faanatinati ane ma ave lana susuga ma taofia mo suesuega, ae o tagata ole aulotu sa iai ile malumalu ile vaveao lea na latou ave le tina o Maria ile falemai.

E tolu masina o taofia le tina mo togafitiga ona o le tugā o manu‘a. Ole ogaoga foi lea o manu‘a ua faaletonu ai se uaua malosi e fesootai i lona maeaalio lea ua faaletonu ai se isi o ona mata, ma ua pi‘o ai foi ma lona fofoga pe a tautala.

E 10 tausaga na finau loia a leoleo e amata ai se faasalaga falepuipui ae ole loia a lē ua molia na finau mose valu tausaga. Peitai ole silasila ale tamaitai faamasino le afioga Mata Keli Tuatagaloa, e ogaoga le solitulafono aemaise ole itu sili ona matuia sa faia male fuafua lelei le faatinoga ole solitulafono.

E 15 tausaga na amata ai le fua ale faamasinoga ise faasalaga falepuipui. O itu lelei mo lē ua molia ona sa ioe i moliaga peitai na tuai ona faia lana ioe ona ole aso ole a valaau molimau a leoleo ae suia ai lana tetee ile ioe. Ose sala na faia e lē ua molia ma lona aiga, aemaise ua faatulai ese ma Faleula ua tapu ona toe nofo ai, o isi ia vaega sa ave iai le faatāua. Ua toesea ai mai le 15 tausaga na amata ai le fua le 3 tausaga ma masina e 3. Ua totoe ai le 11 tausaga ma masina e iva ua nofosala ai nei ile falepuipui Auvale Taumata Bragovits.