Ina ua mae‘a le sailia o ‘au e filifilia ai le siamupini o le taamilosaga o le Super 15 o le 2015, sa lē malolo fetusiaiga a nusipepa, o ripoti a televise, aemaise auaunaga a leitio foi latou i le tau sailiili lea poo fea e ono mafuli i ai le tapuaiga a tagata i lea taaloga.
Sa matauina i lea vaiaso sa agai ma mafuli tapuaiga ona o le nofoaga o loo faatino ai le sailia o le siamupini i Ueligitone ma ua alaga tatau ai ona sola le Hurricanes ma le manumalo. E lē gata i lea o loo taaalo ai foi nisi o alii taaalo matutua i le taaloga i lea vaega o Ueligitone i Niu Sila.
O le matagofie ia o le faataitaiga lelei ua mafai ona aoaoina mai i lenei aulakapi a le Highlanders, o se ‘au e toatele i tama taaalo e silafia tele o le toatele poo nisi foi ua ausia le tulaga ua taaalo ai mo le All Blacks muamua e fuafua i nisi o ‘au a Niu Sila lava latou i le Super 15 o lenei tausaga.
Sa faapea foi le talitonuga faavae o nisi e lē tatau ona vivini fua le moa folau i fanua o Ueligitone. O le tulai mai la o le Highlanders i le Siamupini o lona lea valaauina e taui ai le tautiga i le taamilosaga atoa.
Ma e fua lenei faamatalaga i ana taaloga na latou faatoilaloina ai nisi o ‘au lelei o lenei tausaga i Aferika i Saute ma Ausetalia foi latou. A faapaseneina le tausaga atoa o le taamilosaga e iloa atili ai le eseese mamao lava.
Ai o le mea lea o loo faaaogāina ma faaigoaina e faiaoga o le taaloga lakapi o le ‘mental toughness’. O le mea moni lava foi e lē natia le tulaga ua faaeaina ai le taumafai a Highlanders o lenei tausaga ona o le lelei o le alii Faiaogaulu o le ‘au.
E lelei lona va ma tama taaalo, o se tagata e lava le tofa, atamai e fesuisuiai faatinoga o le taaloga, ma o lona atamai e sailiili metotia e faatoilaloina ai ‘au i taimi o le taaloga, ma ua ia iloa foi auala e faafeai ai alii taaalo i le sauniuni atu i taaloga faatasi ai ma lona tomai faafaiaoga lelei ua faaeaina ai taumafaiga o lenei taamilosaga. Masalo o le isi vaega ua faaeaina ai Highlanders o le mauaina lea o alii taaalo i le tulaga moomia i se ‘au ina ia atoatoa ai, e pei o le “tight five” o le laina i luma, atoa ai ma le alii ia Sopoaga, a o ni tama taaalo foi e lē iloa tele i le taaloga ae ua Siamupini i le taamilosaga ua tofia ai foi i le ‘au tele a Niu Sila.
O le polokalame o le faafaileleina o le taaloga faatasi ai ma le galulue malosi “high performance unit” lea ua faatāua tele nei, aemaise lava i ‘au mai le Motu i Saute o loo matuā aogā tele lava i ai lea faatinoga.
Ma ua aapa foi i ai le tele o Iuni Lakapi mo le faaleleia o le taaloga i auala e siitia ai i se tulaga matagofie i le matamata toe atili faatupuina ai le loto taalo i alii taaalo o le Lakapi e pei la ona Siamupini ai le Highlanders i lenei tausaga 2015.
