Ia paleni le soifua faaleagaga ma le ola i le tino, o le manulauti lea o loo tulituli e le susuga i le faafeagaiga ia Tavita Tavu‘i Tavita ma lona faletua ia Ruta ma le Ekalesia o le Amazing Grace Ministry i Kelston, ia tulaga tutusa vaega uma o le soifua o le tagata i lenei lalolagi. Ia o faatasi le malosi o le olaga faaleagaga o le tagata ma le soifua maloloina lelei i le tino.
O se polokalame ua faaigoaina o le Big Looser, e 10 vaiaso na faataunuuina ai e lenei Ekalesia i lona taimi muamua lenei, ma e 32 i latou sa resitalaina ai. E 3 i latou sa lē mafai ona faaauauina lenei tamoega ona ua faigata ona tetee le tausami, ma totoe mai ai le to‘a 29 seia oo mai i le Aso Sa mulimuli o le fuaga pauna lea sa faataunuuina i le Aso Sa 27 o Mati i le komuniti hall i Whaitekere.
O aso uma o le vaiaso e fai ai toleniga tuufaatasi a o taeao o Aso Toonai e alu savaliga ona fua ai lea o pauna i Aso Sa. O le susuga ia Aumua Too Vaega o se tasi o tamalii o le atunuu ua iloa i tulaga o taaloga sa galulue faatasi ma lenei Ekalesia i le faatinoina lea o a latou toleniga.
O le amataina o lenei polokalame na faafaigata tele i le susuga i le faafeagaiga ma lana ekalesia ona amata, auā e tele ni vaega o taumafa ua faasāina ona toe tausami ai le tagata, e pei o meaai lololo, vaiinu suamalie, meaai e iai le masima ma le suka ma isi meaai e faasā ona tagofia.
Ae na lagona e le susuga i le faafeagaiga e leai se faigata pe a iai le loto, auā o le mea e iai le loto e iai foi le auala e fai ai, ma e tatau ai loa ona taulamua le faifeau ma lona faletua i lenei polokalame tāua.
Ae ina ua faagasolo vaiaso o lenei faamoemoe na iloa ai, e telē se tāua ma suiga fou ua tupu i totonu o aiga ma le lotu, ua lē toe iai ni iputi e fai, lē toe maua ni meaai lololo ae ua iai le naunautaiga o tagata uma e tulituli tatao faamanuiaga o le tino, ua oo foi i le faifeau ua lē toe tausami i se alaisa poo ni meaai suamalie ma meaai oona.
O se luitau tāua tele foi lea ua faapupula mai e lea auauna ma lona faletua mo susuga i faafeagaiga ia tatau ona maua le soifua maloloina lelei o le tagata auā le tausiaina o le galuega Atua poo le Ekalesia.
O le afiafi o le Aso Faraile o loo lumanai ua faamoemoe e lau ai togi o i latou sa finau punouai i lenei polokalame, ma o loo faatinoina uma lava e le Ekalesia faailoga mo i latou sa tauva.
O lenei polokalame ua fuafuaina e taitasi i le tausaga lona faatinoina.
