Taulai le vaai a le Warriors ia Steve Matai

O le alo o Samoa le alii o Steve Matai lea ua taulai i ai le tagai a le Pulega a le NZ Warriors e na te suiina le latou Centre o loo iai nei, pe a uma lenei Taamilosaga, le alii o Brent Tate.

O Matai o le faataumoa lea a le ‘au a Manly a Ausetalia ae o le mae‘a foi o le Taamilosaga a le NRL o loo faagasolo nei e mae‘a ai lana Konekarate ma lea Kalapu, a o le alii o Brent Tate lea ua saini lana Konekarate ma le Kalapu a Queensland Cowboy mo le lua tausaga ina ua ia lē taliaina le isi lua tausaga na ofo i ai e le Warriors.

O Steve Matai ua 25 le matua o lona soifua, e na o le pau lea o le Samoa na iai i lea kalapu a Ausetalia o Manly a o Siamupini i le Taamilosaga NRL i le 2008, ma o se tasi o tama taalo a le au faavaomalo a Niu Sila le Kiwi, na filifili e le ‘au lenei a Manly Sea Eagle lea talavou Samoa i le tausaga e 2004, a o taalo i le kalapu a Marist Richmond Brothers i Aukilani.

I le Taamilosaga o le Ipu o le Lalolagi o le 2008 na lauina ai lona suafa i le au Liki a le atunuu le Toa Samoa, peitai na lē mafai ona ua vave ona fofola i ai le atopau tupe a le Kiwi. Na faailoa e lana Manager e fuafua lava le faaiuga a le alii taalo mo le Warriors i le tulaga o le seleni, peitai o loo faamaualuga le Warriors e latou te manumaloina le alii o Steve ona ua faailoa lona toe fia foi mai i lona aiga i Niu Sila nei ma o inei foi na soifua mai ai, o loo toatele ai foi lona auaiga.

E lē na o le Warriors le au Liki lea e tulimataia le alii o Matai ona o lona agavaa i le taaloga ma e lelei foi lana kiki polo i le pou. O loo faailoa foi le fiafia i ai o nisi Kalapu a Peretania.